強國唔止山寨手機成行成市，連山寨肥姐都有，問你怕未！原名劉輝嘅28歲重慶人林思思，以反串楊貴妃聞名，佢想星途更燦爛，不惜去深圳整容，將自己改造成肥姐，強國版山寨肥姐噚日亮相，八方見過佢，真係見面不如聞名。
體重300磅、身高1.68米嘅思思，體態同肥姐有得揮，呢次整容主要係注射整形物質入眼角同嘴角，做成比較女性化形態，下巴則做拉皮手術收收雙下巴，亦有激光去斑同黑眼圈，整容後似唔似肥姐，大家有眼睇，佢話唔係要百分百神似，「我只係想將開心果精神延續下去。」
肥姐有好多fans，山寨肥姐驚唔驚激嬲觀眾甚至惹來欣宜反感呢？思思話唔怕，更話如果欣宜都覺得佢似肥姐，唔介意畀啲母愛欣宜，至於秋官，八方相信一定走夾唔唞。