《美女廚房》前晚在將軍澳電視廣播城錄影，請來熊黛林（Lynn）、吳雨霏（Kary）及姚樂怡一眾美女做嘉賓展廚藝，Lynn和Kary一起捉墨魚雞手鴨腳，吳國敬英雄救美出手相助，但卻被噴到成身墨汁，認真失威。
吳雨霏在上一輯無綫節目《美女廚房》中火燒廚房，結果被封為「地獄廚神」，前晚她再亮相新一輯《美女廚房》，還搞笑地帶同滅火筒入廠，事前她說：「我今次目標唔係要煮好嘢食，而係唔好燒着嘢。」
正式錄影時Kary和Lynn等人要煮一味叫「軟骨富貴乞兒雞」，今次Kary雖未有火燒廚房，但當她炒餸時竟連豉油蓋也一併倒落鑊，鄭中基、方力申及梁漢文（Edmond）等人在電視機見到大聲驚叫，Edmond坦言要小心看清楚以免食膠落肚，周中試食後更苦笑說：「真係有膠味喎。」
到美少女廚神環節時，參賽者旺旺竟穿上熱褲做出一字馬動作，還有走光之嫌，結果成功出位。
之後Lynn、Kary和姚樂怡要炮製墨魚，但姚樂怡卻不敢徒手捉起，Kary和Lynn齊齊幫手，但依然不成功，擔任嘉賓的吳國敬即英雄救美出手相助，但捉來捉去都捉不到，最後連他也被墨魚噴到一身墨汁，他苦笑說：「冇衫去曾志偉生日party。」
將為城城學烹飪
問Lynn其男友郭富城的廚藝如何？Lynn笑說：「我唔知佢識唔識煮，你哋問佢。」Lynn又表示待幾年後會為城城學烹飪。另外，提到有消息指Lynn連同o靚模楊穎（Angelababy）杯葛Kama（羅凱珊），Lynn聞言說：「邊個Kama？」記者指是「邦民女」Lynn才說：「哦，個樣幾甜個女仔。不過我知Baby（指Angelababy）好乖，應該唔關佢事。」
採訪：王崇穎
攝影：陳慧安
