Mazda絕代雙嬌

Mazda絕代雙嬌

「萬事得」呢個中文名實在改得精妙,萬事皆得,姑勿論Mazda嘅車有幾得,無可否認嘅係,追溯品牌源頭,經歷數十載,曾經大起大落,依然粉絲無數。而Mazda嘅粉絲,大多基於認同品牌嘅創新精神繼而捧場愛上其車系。Mazda亦的確創咗唔少先河,當中最叫人眼前一亮嘅,要數將中置引擎+海鷗翼放於K-car之上嘅AZ-1,以及採用轉子引擎嘅RX-7!

記者:梁美甜
攝影:伍慶泉
部份相片及資料提供:MX-5ClubdeRoadsterHK
SpecialThanks:日本絕版車會

絕種鷗翼K-car

鷗翼,我一直以為係超跑嘅「光環」,估唔到,佢竟然曾出現在一部K-car身上。叫得做K-car者,其車身長寬高分別限於3.4、1.48及2公尺之內,排氣量少於660cc,94年MazdaAZ-1採用TurboGullwing660ccDOHC引擎,絕對係一部高性能運動版K-car,九十年代而言,更係創先河之舉。「當年無K-car係中置引擎,仲要有埋海鷗翼,可見萬事得喜歡創新,用中置偈都係創意之舉。車主Nelson邊指住後軸前副偈解釋,「Mazda係好堅持信念去生產。」早有K-car跑車,之後有轉子引擎車系,以及發揚光大嘅開篷跑車MX-5,吸引者眾或許就係因為呢份堅持。「係!之前睇日本車書,興番講近幾代汽車品牌嘅Layout。見到AZ-1,覺得個Layout真係好靚,於是託朋友買,結果求咗個車主成個月至首肯,由於係入口中古車,唔出得牌住,要等!」好多中古車由於排廢唔達政府要求,唔可以出牌,要部車足「廿歲」先可以豁免,Nelson仲要等多5年左右喇!要搵呢架咁特別嘅K-car都唔易,一般都要上網摷,日本二手市場價過百萬日圓(約七、八萬港元),但唔易搵。

■尾喉的骰得過份。

■車仔細細,但就用四圓錶版,都有跑味。

■可愛尾燈,有露筍招牌雙圓尾燈感覺。

■中置引擎,亦係呢部K-car嘅獨特之處。

■腳踏上嘅型號標誌很有古典味。

Nelson

AZ-1Layout好靚,K-car仔但就係一部中置引擎高性能小跑。

轉子風雲

講Mazda精神象徵,一定係轉子引擎!Mazda嘅轉子開發長路,喺1961與西德機車廠NSU正式合作開始。當時轉子技術尚未成熟,直至1967年出現CosmoSport,先係第一部搭載轉子引擎兼掛住Mazda廠徽嘅車種。「轉子引擎運作原理有別於一般汽車引擎,係一種需要技術去操控嘅車種,低速扭力強,挑戰性亦相對比較強。」85年RX-7車主Ronald喺澳洲讀書已經揸住呢部車,至今14年,夠晒長情,部車睇落仲好新淨!「呢部應該係第三代RX-7,可惜好多人睇數字同受品牌效應影響,認受性低,易手市場價亦偏低。」Mazda亦可以話係現時唯一一間仍生產轉子引擎車種嘅車廠,呢種堅持,其實幾叫人佩服!

■氣壓式開尾窗,型唔型仔?

■內裝設計固之然係以簡潔為主。

■當年嘅梗係棍仔啦。

■大大個風扇為引擎散熱。

■早年有天窗已經叫豪,而只作Till-up式更加唔常有,即係又罕又豪。

Ronald

就算係二十幾年前車款,今日睇落都不落俗套,線條感覺依然好靚。

熱賣人氣王MX-5

要數Mazda車系之中最具影響力嘅熱賣王,非5仔(MX-5)莫屬,據一班5仔粉絲表示,MX-5當年車價約20萬,都算貴,但就係一部開篷彈燈跑車仔,稱得上係九十年代中產車。就一齊嚟睇睇5仔嘅威水史!

■雙座開篷小跑MX-5於89年推出市場。

■擁躉提供購自日本的5仔畫作。

■被稱為5仔之父嘅貴島考雄以及第三代MX-5。

■05年全新MX-5車型。

■三代同堂,都係MX-5!

■據講香港第一批5仔曾於澳門落場砌過。

■第三代MX-5落場版原型,真係更靚仔更型。

■最新一代MX-5Roadster。

■5仔亦係改裝熱選,變成蝙蝠車就幾出人意表。

■呢架5仔更被改成超大輪胎爬山車,搞笑!

Mazda軌迹

Mazda源於1920年由JujiroMatsuda創於廣島的東洋軟木工業株式會社,經歷了大地震和原爆,每次危機後,都出現突破性的發展。由生產工業機件,大地震後轉產輕型機車,二次大戰後更急速發展,到1960年以Mazda之名推出了第一部乘用車R360Coupe,才正式進軍汽車市場。在歷史中屢有創見之作,亦係品牌嘅一大特點,當中以引入轉子引擎最為矚目。

a.據資深車迷表示,呢個係品牌原型廠徽。

b.第三代RX-7車身見到以品牌名為廠徽。

c.喺萬事得當紅嘅九十年代,最常見係呢個廠徽。

d.AZ-1當年嘅車徽,不過屬日版。

e. 92年香港特別版V-Special海報,當年車價盛惠$269,000。

f. 靚車配性感美女,早就係指定動作。

g. 5仔風靡全球,呢張海報來自96年加拿大,當地5仔又叫Miata。