民建聯領導層完成換血第一步，新一屆50個中委噚日誕生，多位獲捧新星例如未來副主席大熱張國鈞、葉國謙姪仔葉傲冬，以及曾鈺成愛將鄭泳舜都一如所料順利入圍，另一大佬劉江華徒弟楊文銳卻落選，令部份黨員覺得意外。
挑戰李慧琼賴嘢
另一意料之內嘅結果，係政壇老將王紹爾小二哥落選。雖然民建聯銳意年輕化，但新一屆中委平均年齡逾47歲，年僅56歲嘅小二哥喺呢方面雖冇優勢，但亦唔比其他人輸蝕，黨內「死因」研究，估計佢舊年立法會選舉前玩嘢，聲言要退黨同李慧琼硬撼係致命傷。
李慧琼係黨內重點培訓新秀，被視為曾鈺成欽點接班人，小二哥咁唔畀面，八方聽聞事後唔少人都想踢走佢，覺得佢玩得太盡。個底畫花咗，好難翻身咯，佢唔係立法會及區議員，中委都落選，成為三無人士，唔知仲有冇興趣玩落去。新一屆中委下星期二推選正、副主席，前港進聯溫家旋做到中委，一般估計佢幾乎篤定做副主席。