金融海嘯下人才亦不愁出路。銀行界頭號好人賓架——前星展香港前零售銀行業務總監Sunny張耀堂舊年8月底離職後，一直冇講去向，噚日終於證實過檔VISA，出任香港及澳門地區總經理，掌管VISA港澳兩地策略發展。
Sunny道別星展後，市場曾有傳聞話佢會加盟建銀亞洲，執掌零售銀行部，但最終不了了之。99年加入道亨前，Sunny喺花旗工作超過26年，94至97年間擔任香港信用卡業務總經理。01年道亨被星展併購，一直做到舊年。以佢接近30年零售銀行界經驗，新工作可謂冇難度。
至於VISA前任港澳區總經理杜卓文，就調任韓國地區總經理，已經去咗首爾履職。