分拆股票，以便在股東大會投票，在香港是合法行為，法律並不禁止。要注意嘅係，某些議題如果只准小股東投票，不准大股東投票嘅話，與大股東行動一致嘅人士，或被確定與大股東一致行動嘅人士，即使拆票，跟住投票，呢類投票當作無效。
既然咁清楚，反對大股東與贊成大股東之獨立人士，為咗自己利益，都可以拆票、投票，冇可能反對者一早拆咗票就係忠嘅，贊成者拆票就係奸嘅，咁易分辨忠奸嘅話，簡單過將關德興與石堅分類。在法庭上，正反雙方嘅大律師雄辯滔滔，並非要從道德層面講邊個忠，邊個奸，而係要從實質證據與法律觀點爭辯是否違法。於電盈私有化一案中，高院法官關淑馨講得好清楚，法庭不能同意從道德層面下判決。至於上訴庭有何決定，今日就知道。
上星期六《明報》刊登戴耀廷專欄，講「叻人文化」，講到：「香港式的叻人就是在於深諳鑽營之道，在法律中尋找灰色地帶……法律只要沒有明確禁止，不論這種做法是有違道德，或是社會或其他人要付出多大的代價，只要利己所至，香港叻人就不會不去做。」
戴耀廷好似係香港大學法律學院教授，佢嘅同門師兄弟姊妹中，叻人最多，陳景生大律師啦，余若海大律師啦，湯家驊、余若薇……多到數唔晒，呢班法律界叻人唔知會唔會返港大教幾堂：如何做叻人，或是不可做叻人呢？如果冇呢班港大法律系教出嚟嘅叻人，港大法律學院邊會有今日咁威威呀？叻人陳景生（代表陳振聰爭千億遺產），與余若海（代表盈拓）係唔係要再回港大上課，聽戴耀廷教授講書？
研究法律嘅王岸然上星期在《信報》專欄文章寫咗一句：就係最不道德的事就是領取天價律師費的大律師，在法庭上不講法律觀點，只講道德層次（大意如此）。好多老友睇完都話王岸然一針見血！馮華健與潘松輝兩位大律師看了，不知有何感想。中大蘇偉文教授好似話過要將電盈私有化個案教學生，家睇嚟三間大學法律學院嘅學生都值得花時間研究電盈私有化個案，港大法律系最着數，因為校友之中，最多戴教授筆下之叻人。即使唔係港大法律系產品，叻人亦多到不得了，證監會今天如果又輸了，啲叻人可能會教證監會再上訴，利用公帑大打官司，及利用證監會不用賠償任何人之優勢，一於打拉布拖垮電盈私有化，那顧得絕大多數贊成私有化（以股數計，曾淵滄教授講嘅）嘅小股東嘅利益！