【衞詩被囚第52日】衞詩喺日本涉嫌藏毒被捕，家仍被關押喺東京灣岸警察署，至今日為止已被囚52日。由於日本警方喺衞詩行李搜出10幾包共重逾3克嘅高純度四號海洛英，衞詩已定喺下星期五（24號）上庭，佢嘅命運如何到時自有分曉，但藏有海洛英一旦罪名成立，最高可被判入獄10年。
衞詩男友關楚耀甩難後，本月2號舉行咗謝罪記者會，宣佈暫別娛樂圈，當時佢喺會上公開道出掛念女友之情，自此關楚耀就返屋企閉門思過，到今日已連續閉關14日。
衞蘭演出金像獎
噚日馮仁昭同關楚耀所屬嘅環球唱片高層黃劍濤傾開，佢透露關楚耀呢排喺屋企懺悔，但並非無所事事，黃劍濤話：「佢家進修鋼琴同結他，仲有作曲。」馮仁昭聽聞關楚耀好掛住衞詩，知道女友要上庭後更加擔心，雖然佢足不出戶，但都不斷致電各方友人希望打聽到衞詩嘅最新狀況。
至於衞蘭喺復活節假期後已經復工，如常錄音，嚟緊星期日仲會為金像獎頒獎典禮擔任表演嘉賓，同側田及王菀之獻唱電影金曲，當晚司儀就係謝安琪。