港大學生會會長陳一諤近日大出風頭，淡化屠城、美化劊子手、醜化學運領袖言論激起全城公憤，港大學生更要罷免佢，不止一個人向八方報料，指陳一諤公然為虎作倀乃因後台夠勁，有傳佢父親係港大法律學院教授兼基本法委員會委員陳弘毅！
陳弘毅係深受尊敬嘅法律學者，北京亦好器重佢，八方問過港大中人，不過冇乜人知佢家庭狀況，是否有個仔讀港大更聞所未聞，八方詢問陳一諤同陳教授有乜關係，佢玩神秘唔回覆，八方惟有問陳教授，教授透過電郵嚴正表示自己冇兒子，外間傳言絕冇根據。
內閣用教授名惹誤會
八方追查呢個謠傳來源，發現可能同陳一諤角逐學生會會長時，內閣名為「弘毅閣」有關，不排除有人穿鑿附會，或者將錯就錯，同陳弘毅扯上關係。現年19歲嘅陳一諤係社會科學院一年級生，係沙田名校蘇浙公學高材生，高考有3A，有校友指佢由細到大都係風頭躉，做過學生會會長，加上個樣唔差，所以好多女同學冧佢，亦甚得老師歡心，曾搵佢返學校代課㖭！
雖則同姓三分親，但聽完陳一諤嘅冷血言論後，八方相信好多姓陳嘅熱血分子都不齒佢所為，唔使滴血都知大家唔會溝得埋。事實上好多姓陳嘅人都睇唔過眼陳一諤，港大女生陳巧文直情發起罷免陳一諤行動，據稱已經搵到足夠學生聯署，啟動公投罷免陳一諤，如無意外，最快下禮拜就可以全民投票拉佢下馬。
呢次係港大學生會近30年嚟首次有會長被倒，八方呼籲港大學生不能夠一錯再錯，上次冇投票，或者投咗票畀陳一諤，家覺得睇錯人，應該把握機會撥亂反正，任由一個甘於為屠夫塗脂抹粉嘅人做學生代表，港大師生顏面何存？
陳一諤角逐學生會會長時，聲言以國父孫中山做榜樣，孫中山泉下有知，唔知有何感想？有個港大學生話，目睹好多同學對呢件事仍然好冷漠，甚至不願了解六四事件，令佢覺得好心酸，難怪學生會被赤化、滲透，八方認為佢唔使太灰，港大至少還有你，只要人同此心，使乜怕陳一諤！
mailto:[email protected]