中大東亞研究中心名譽主任李歐梵噚日應中大學生會國事學會邀請出席論壇講五四事件歷史，原來噚日亦係李教授榮休之日。喺中大教完最後一堂課嘅李教授話，佢首份教職就喺中大教書，之後去到美國哈佛大學教書多年，2001返港執教鞭，先後喺港大、科大任教，03年後重回中大，兜個大圈，今年退休。
由於李教授仍有一班博士生要指導，所以佢暫時退而不休，李歐梵稱對中大好有感情，臨別秋波，就算唔啱聽都要講出嚟，佢話希望中大高層聽得入耳，應該畀學生自由選科，反對本科生讀嘅科目太專業化，佢又指香港學生上堂時好沉默，表面好乖，其實係掛住搵外快，內地生上課時比較主動發問，佢建議港生畢業後，唔好掛住搵工，不妨去外國流浪一年半載，體驗生活，擴闊視野，日後受用不盡。