因為入股領匯（823），搞到街知巷聞嘅英國兒童基金TCI又有新消息，今次唔係講新投資，而係佢哋亞洲區負責人何志安（JohnHo）計劃離開。
同創辦人意見不合
據彭博報道，JohnHo係因為同基金創辦人就亞洲投資策略意見不合，所以走人。
報道冇講分歧喺邊，但就話John計劃自己成立基金，專注亞洲區股市。
TCI自05年開始吸納領匯，之後又入股華置（127）、百仕達（1168）、華電（1071）同越投（123）等公司；但舊年年底突然用「蝕本價」向華置主席劉鑾雄售回8%華置股份，之前亦先後減持越投同保華集團（498）。
怕且都估到邊個睇好本地股市，邊個想散水。
查實TCI三個創辦人之中，有兩個走咗，只剩低ChristopherHohn，家吓John又走埋，華華想知佢哋會唔會賣領匯股權囉。睇嚟領匯主席蘇兆明應該搵TCI傾吓，好似大劉咁買咗佢手貨，咁就一了百了。