王祖藍噚日喺中環港外線碼頭拍攝電影《矮仔多情》一場煞科戲，導演阮世生為佢製造咗個驚喜，搵咗郭富城女友熊黛林（Lynn）客串，但事先冇通知祖藍。其實喺戲裏面祖藍已經要面對Angelababy、徐子珊等多位比佢高嘅女星，不過比起身高5呎10吋仲要着住3吋高踭鞋出現嘅Lynn，只有5呎3吋半高嘅王祖藍就好似小朋友同大人拍拖一樣。
搵高妹生BB
但係祖藍一啲都唔介意呢個安排，仲識自嘲咁話：「呢個真係奇觀，都係我事業嘅『高』峯，同佢拍戲就好似望住IFC全港最高建築物咁。呢個故事亦畀我明白到人生充滿可能性。」佢話事實上都唔介意同比自己高嘅女仔拍拖、結婚，祖藍話：「嫲嫲落聖旨話我將來個老婆一定要高過我，希望第時生出嚟嘅下一代可以拉高啲。」對於即將舉行嘅金像獎頒獎禮，Lynn話會去捧場：「都有啲緊張，我一定會扮到靚靚去見人。」
