社民連多無證議員，唔方便北上，復活節假期飛去台灣考察兼交流，大佬毓民台灣人脈廣闊，此行同唔少官方人員接觸，又同國民黨、民進黨交流。
溫總爬都想去嘅日月潭，有丐幫之稱嘅社民連亦有去觀光，當然唔使爬咁矯情，八方聽聞佢哋去到台中，本來安排同台中市長胡志強見面，不過出發前收到對方通知，表示市長公務繁忙，唔得閒安排見面，希望日後有機會一盡地主之誼。
忽然變卦，有人猜測可能同胡志強今個星期訪港有關，事關港府高調迎接胡志強，台、港官方關係升溫之際，胡志強同反對派政黨會面，或者有人覺得不太方便，話說回來，胡志強喺香港會同立法會議員接觸，一定有機會同社民連成員握手。