之前傳過香港娛樂圈有位集郵女星，專媾樂壇四大天王，希望集齊一套；英國娛樂圈亦出現類似嘅女殺手，但目標係熱刺當家球星，佢就係大名鼎鼎嘅06年英國小姐丹妮莉（DanielleLloyd）啦！呢位奇女子之前「收集」咗舒寧咸同迪科爾，最近連新人奧哈拉亦據為己有，認真厲害！
最新撻着奧哈拉
22歲嘅奧哈拉係英格蘭小國腳，上周六英超對韋斯咸冇份打，於是約埋三圍據報係30DD-26-35嘅丹妮莉去蒲；兩人夜晚先喺酒吧談談心，然後直闖人氣食店Nobu食壽司醫肚，再竄入Mayfair酒店（唔知搞乜），最後去埋棕櫚島賭場，凌晨一點先吹雞完場，節目認真豐富。
奧哈拉同丹妮莉幾時「撻着」冇人知，當晚目擊者話兩人全程手拖手，喺店內仲情不自禁接吻，咁癡纏應該一齊冇耐啦！呢個丹妮莉似乎對熱刺球星特別有feel，繼06年同大自己17年嘅舒寧咸一齊，07年又同大1歲嘅迪科爾玩埋，今次輪到細3歲嘅奧哈拉，上演一幕熱刺帽子戲法，真係「大小通吃」。
出自傳盡爆秘聞
我求大俠就勸奧哈拉要帶眼識人，事關《每日郵報》話丹妮莉今年會出自傳，講作為模特兒同WAG（球星另一半）嘅經歷，仲引述知情人士講：「本書會寫好多名人，當佢哋知道自己一舉一動會被寫出嚟，肯定『唔老嚟』，但一切都太遲喇！」奧哈拉，好自為之！
所以呢，當一位女性智慧與美貌並重時，各位男士就要小心喇！呢位丹妮莉小姐今年25歲，除咗集齊熱刺3代「郵票」，利物浦翼鋒賴恩巴布、伯明翰射手賓特，同埋已由曼聯過檔巴塞隆拿嘅碧基，甚至連英國歌星PeterAndre都曾經有過一腿；所以丹妮莉本自傳一出應該幾賣得，唔知本書名會唔會叫《我的郵票簿》呢？