大市飛升，直衝去年底15781的反彈高位，恒指收15580，大升678點，期指更勁，飆高722點，大市成交急增到754億元。昨日大裂口高開，升破上次高位後，下一目標係16500。
H指亦大升383點，重上9000大關，高收9214，資源股氣勢甚盛，江西銅（358）、中國鋁業（2600）同鞍鋼（347），升幅都超過11%，馬鋼（323）更勁，大升13.5%，煤炭股進賬亦可觀。
剛宣佈業績的首長國際（697），到尾段發力，高收0.94元，升6仙，升幅只6.8%，但成交就大增到2.08億股，比上周四的4650多萬股，大增3倍多，動力好強，今次以大成交而突破前高位0.93元阻力，20日線（0.824元）亦升破50日線（0.81元），確認開展大升浪，初步上升目標係1.16元，升幅超逾2成。
首國係大型鋼鐵股中PE最低，最抵買一隻，特性係慢熱，但只要有資金到位，一發力，升幅會好急勁，去年10月底，就曾經由0.39元起步，在短短11日內，大升到1.07元，升幅170%，而當時嘅成交亦未有噚日咁「墟冚」。
往績PE不足5倍
受全球經濟轉壞影響，9成以上嘅上市公司，去年下半年業績都倒退，首國亦唔例外，08年（12月結）上半年，盈利10.9億元，升1.35倍，全年則賺14.19億元，只微升1%，但能夠保持，已算唔錯。若撇除若干澳洲公司之購股權及股份減值，以及員工購股權費用等非現金支出，核心營業利潤為17.6億元，比07年上升43.6%。去年營業額176.7億元，升54%。每股盈利19.67仙，末期息3仙，全年共派5仙，往績PE只4.8倍，息率5.3厘。
在出售多項非核心業務後，首國已逐步整合成縱向鋼企，坐擁鐵礦石和焦煤資源，既可控制原材料成本，亦可提升效益。首國產品以寬厚鋼板同高增值鋼材為主，在市場競爭中佔有極大優勢。中央振興經濟，基建、造船同機械行業都受惠，對首國更為有利，公司管理層亦對行業復蘇有信心。
09年，保守估計首國盈利比去年打個8折，只有11.3億元，每股盈利15.7仙，派息保持5仙，即使以短期目標價計，PE亦未夠7.5倍，行業復蘇一確認，股價有機會再急升。
郭兆誠