大姨媽我都係一個性急嘅人，遇到別人做事慢吞吞，免不了會，但又不至於會開口罵人，我靚太一個無情白事罵人有失身份。不過呢個世界真係唔少人修養奇差，噚日揸車去又一城同朋友High-tea行經荃灣青山公路上龍翔道，喺青山公路居然見到部搵食貨Van來個急切線由慢線Cut出我前面不遠處，望清楚，原來係避開佢前面部學神，離譜嘅係佢居然喺右線慢行同部學神平排，個熟男司機仲開窗狂寸人：「學車就唔行得高速，阻×住晒」云云。
我見個女學神扁晒嘴幾可憐，無辜辜就俾人罵一頓不免激發起大姨媽我嘅母性，好想臭罵兼點醒個熟男，可惜大家行車線唔同，佢左穿右插向深水埗方向捐走。話時話，青山公路得兩條線，當時都已經三點幾，路面唔算多車，大家行車咪將就啲，學神部車都掛住大大個學牌，無人叫你仲跟住佢行咁叻叻。仲有，邊個話青山公路係高速公路呀？係，根據《道路交通（駕駛執照）規例》（第374章，附屬法例）第12或12A條法例規定，學神係唔可以上高速公路，但青山公路都唔係高速，人哋仲已經行緊慢線，你有牌又咁「熟」例就自己開走啦，真無品，唔好唔記得大家都曾經做過學神！
文：大姨媽