泰國暴亂似有平息迹象，局勢逐漸回穩，港府高層亦有覺好瞓，事關喺泰國嘅香港人，只要唔好輕舉妄動，應該可以平安返嚟，再派包機或者入境處人員去當地營救港人機會不大。雖則高官鬆一口氣，但唔少官員仍然頂住道氣，對於市民外遊玩命，大安旨意政府包機，十分睇唔過眼。
港台唔報「溫馨提示」
一般人可能冇留意，原來上次包機事件後，保安局一直有注意泰國政局，當地動亂平息後好一段時間，仍然日日透過新聞處發出提示，呼籲市民若要去泰國，應該睇清楚當地情況，但由於曼谷已回復正常歌舞昇平，傳媒自然唔再報道保安局嘅「溫馨提示」，連官府香港電台都不予報道，八方聽聞有關方面特別向港台打招呼，希望港台畀啲面，花些少時間講吓旅遊提示。
保安局莫失莫忘發出「溫馨提示」，一來係為市民着想，另一個原因，恐怕係因為唔想再有事故時，又俾人批評後知後覺，家就可以振振有詞咁講，早就提醒市民留意泰國局勢，唔好出事後又賴地硬complaint、complaint、complaint，「早就話咗你哋㗎啦！」
可惜市民對高官言論始終聽唔入耳，呢方面金管局任總嘅體會，相信比保安局局長李少光更深。任總噚日揚言早在06年已經提醒投資者要小心衍生工具風險，後來更連續多次撰文叫散戶留意迷債唔係咁安全，然而當時個市炒到癲，阻住發達嘅說話講咗等於冇講，任總無疑白費口水筆墨，散戶始終都係要輸身家。
市民素來當高官言論係耳邊風，呢個問題不能怪責市民，因為高官發噏風實在太多，由特首煲呔講撐企業救市，到財爺鬍鬚曾話要保就業，以至被指派做「樹王」嘅唐英年，邊個高官平日不是廢話連篇？政改方案拖到冇影，派糖救市救人一味得個講字，高官通通係廢話王，冇人理會任總同李少光講乜絕不出奇。特區高官講嘢冇人聽呢個問題，源自議而不決、決而不行毛病，一個言而無信，最叻掟份諮詢文件出嚟玩弄民意嘅政府，權威盡失，焉能怪市民唔聽你支笛！
mailto:[email protected]