殺人放火金腰帶！玩黑幫風雲、由小角色逐步做大佬嘅古仔，最出名首推當然係《教父》三部曲。三年前《教父》出Game，即使未至頂級水準，觀感上亦似《GTA》，但已夠班Fans玩得不亦樂乎。如今續集則按劇情發展一邊做大佬，一邊指揮班細嘅孭行架生上陣，就算唔係戲迷都可以試吓運籌帷幄、統一美國黑道王國嘅滋味。
文：陳福榮
搵食前選定馬仔
電影第二部由Aldo遇刺開始，玩家控制嘅新主角Dominic要繼承職責，分別喺古巴同美國嘅邁亞密、紐約肅清敵對勢力，務求成為有勇有謀嘅新一代大佬！
鑑於《GTA3》某程度上奠定咗暴力黑幫遊戲嘅標準，所以《教2》沿用可隨時開拖及周圍揸車嘅3D版圖設計，仲有自由度幾高嘅主線故事架構等。當然本作亦有新點子，就係唔單止自己一人搏命，仲要徵召最多7名具備專長嘅手下幫拖，皆因執行任務時可作4人行動，想妥當潛入目標地點甚至進行爆破，就要搵最啱用嘅馬仔跟你搵食；當然你想挑戰極限專搵廢柴都無問題。
「大佬視點」講求戰略
如果純玩以暴易暴爭地盤嘅動作Game，咁就實在太膚淺啦！遊戲新加入「大佬視點」；只需因應敵對勢力嚟預先部署，就可同時應付三大城市嘅戰況，簡單講即係加入類似「實時戰略」遊戲元素。
今集新增「犯罪環」系統亦係致勝關鍵；每當佔據特定地盤，玩家就能獲取提升某種技能嘅物品（譬如防彈背心）；所以要點樣破壞對手「犯罪環」，並將相關能力取到手，當中涉及嘅勝敗關鍵，真係幾鬥智鬥謀。
網上對戰博升級
用嚟幫角色升級嘅仲有賺錢強化武器，無論手槍、密林甚至卡邦式機槍都可以加強火力，再配合技能就會有相得益彰嘅效果。另外，剛才提到班手下各有特長，仲可以透過履行任務和網上對戰模式嚟逐步變強，改善爆破或開夾萬等能力以便搜掠，因此實在有必要花費時間喺網上模式身上。仲有多不勝數嘅殘暴處決方法俾你學，似足睇緊真人版電影咁有迫力。
Profile
機種：PS3、Xbox360
廠商：EA
類型：ACT/AVG
人數：1-16人
價格：$318（PS3）、$299（Xbox360）
