花旗股市假期前顯著上升，前晚雖然回落些少，但無礙港股炒上，噚日港股喺滙控（005）帶領之下升近700點，成交仲好勁，有754億元。
由近排國內公佈嘅經濟數據顯示，4萬億元人民幣救市措施已出現效用，最直接受惠嘅係銀行股，大家可以繼續跟進，跟住要留意嘅係保險股。
平保C輪15416：平保（2318）噚日報收53.25元，只係升咗1.6巴仙，表現確係略為遜色，不過大市輪流炒，升得少嘅重磅股，反而值得特別留意，平保炒上去先睇59元，破位睇70元，可以諗吓隻C輪15416，現價16.8仙，有效槓桿2.1倍。
正股升上70元，15416有機會見28.9仙，正股跌穿48元，就沽咗隻輪止蝕。
俊樺