【第28屆金像獎之男配角篇 倒數第4日】做主角難，當配角更難，難就難在配角要知道自己的定位，不能讓主角感到你在搶鏡，正如你幾時會見到石堅會在《黃飛鴻》電影系列裏面打贏一樣，所以今屆憑《証人》獲提名最佳男配角的廖啟智，優勝之處在於他一方面令觀眾永遠知他存在，而主角又感受不到威脅。智叔16年前憑《籠民》奪最佳男配角獎，他笑言囝囝嫌該獎座好舊，是時候拿個新的回來。
廖啟智入行20多年，前後獲提名金像獎最佳男配角4次，93年憑《籠民》扮演智障漢獲最佳男配角獎。不過智叔直認初出道時沒想過會循配角方向發展，他呷着一口咖啡輕輕地說：「啱啱出道嘅時候，個個都係憧憬做主角啦，嗰時後生不知天高地厚又有理想，所以想當主角嘅感覺強烈好多。不過時日耐咗，發覺自己走嘅路向唔同，亦正如啲人講角色無分大小，只有價錢先分大小啦。」
「我唔跌得幾多套」
智叔表示電影跟電視的計算不同，他說：「電影同電視唔同，電影你可以唔接，但係電視基於合約原則同責任心，你唔可以推，推得多你個名都唔好，但係喺電視咁耐，多多少少都建立咗一個形象，如果打爛咗都幾頭痕，你話後生跌低可以再嚟過，家我唔跌得幾多套。而電影嘅計算又會唔同，導演搵得我除咗演戲之外，仲有我嘅功能，因為一個人演戲幾出神入化都好，配合唔到套戲就冇意思。我嘅功能係一個工匠，你要求嘅我畀到你，唔需要我嘅時候，你唔會感受到我嘅壓力。」智叔言下之意是不會讓主角有被搶戲的威脅，不過他說：「我只係知道自己喺戲裏面嘅定位同埋對手嘅需要啫。」
智叔憑電影《証人》第4次獲提名最佳男配角，他不諱言有點意外，他說：「配合番需要，我表達得比較內斂，不過都好多謝評審對我嘅認同。其實我覺得樊少皇同家棟喺《葉問》裏面嘅表現好出色，反而有機會攞呢個男配角獎。」
「估唔到個仔咁識講」
智叔謂除了《籠民》獲獎較有印象外，04年憑《無間道II》再獲提名，令他有一定滿足感，他說：「明明個角色都好難搵戲做，都俾我搵到戲演仲有提名，都算開心。」相對上次拿獎已經是16年前，智叔笑言大仔也有提起，他笑說：「我之前個獎放喺櫃，早排囝囝攞番出嚟睇，仲話『爹哋呢個獎都好舊，係時候攞個新嘅返嚟。』聽完都覺得好好笑，估唔到個仔咁識講嘢。」
採訪：何永寧
攝影：陳俊強
場地提供：沙田麗豪酒店
最佳導演競爭激烈
今屆最佳導演獎，大熱之選分別有《天水圍的日與夜》的許鞍華及《葉問》的葉偉信，正好一柔一剛。許鞍華從小事情見證天水圍悲喜；葉偉信以大時代表達英雄落難的無力感，各有優點。
影評人之選
許鞍華拍出人情味
影評人馮家明首推《天水圍的日與夜》的許鞍華，他說：「佢由好平常嘅一家人，拍到好有人情味，令人好舒服，並不煽情。」另一位影評人登徒也大讚許鞍華說：「佢用一個好人文氣息嘅題材、好地道嘅故事，將一個悲情城市變得好有人情味，手法簡單含蓄，超越社會題材嘅局限。」
《葉問》的葉偉信也是大熱之選，馮家明表示：「葉偉信拍得好細膩，角色描寫亦非常精采。」至於《文雀》的杜琪峯，登徒說：「杜琪峯將地道小品拍出俠義精神，戲中個個大男人變晒大細路，營造咗個小朋友純真世界。」
