我求大俠冇咩愛，惟獨愛國，歌曲《龍的傳人》更係由細聽到大；不過入邊句歌詞「黑眼睛黑頭髮黃皮膚」係時候改改，因為龍的傳人可以係黑皮膚。最近中國國家男子排球隊，就有位叫丁慧嘅黑人新秀，成為主要體育項目首位「外國人」。
爸爸係南非人
呢位20歲球員爸爸係南非人（出世後都未見過），媽媽係杭州人；細細個鄰居叫佢小黑，10歲開始玩排球、04年入選國少隊、07年入選國青隊，仲奪得該年世青賽亞軍。佢原本有機會參加京奧，可惜因年紀太細冇入選。小黑身高1米85，司職自由人，憑靈活身手同柔韌性，成為國家隊明日之星。
其實，08京奧替中國出戰馬術嘅華天亦係中英混血兒，中國花樣滑冰亦有幾個中蘇混血兒。外國方面，前荷蘭國腳雲達係中蘇（蘇里南）混血兒，美職聯球星程拜仁亦係華人後裔。正所謂世界大同，仲講膚色就認真out啦！