復活節假期，天氣良佳，風和日麗，最宜郊遊，左丁山等一行人，既然留港消費，星期六中午到酒樓飲茶，發覺人客竟然比平時少咗一大半，想來不少人正趕及在星期五出外旅行了。飲完茶，順便到馬場一行。不可誤會，呢日冇馬跑，只不過係到馬場裏面嘅彭福公園行個圈而已。彭福公園嘅面積遼闊，有水有樹有大草地，在此行路，幾輕鬆㗎。原來到彭福公園之人，好多好多拖住愛犬一齊漫步，誇張啲講句，公園內的小童與小狗嘅數目差唔多，小狗在香港難得有一塊草地可供自由奔跑，都唔知跑得幾高興，唔怪得不少一啤啤拖友或夫婦在此與小狗一齊玩耍，搵勻港九新界，「放狗」、「行狗」最方便、最景色怡人嘅地方，相信係彭福公園咯。
香港犬兒甚幸福，主人照顧無微不至，有啲年輕夫婦不喜生兒育女，愛養貓、養狗，慳番一大筆供書教學嘅費用，花三分一於貓狗方面都係一個大數目，唔怪得有人話要讀獸醫、開寵物店。城市大學仲要話開獸醫學院㖭，俾葉劉淑儀議員痛批。城大申請開辦獸醫系或獸醫學院，其實十畫未有一撇，葉劉女士唔使咁快批評住，不過城大校長郭位教授上任未久，大概唔熟悉香港嘅情況，未寫好完備計劃書向教資會申請，城大已向傳媒放風，於是畀個機會葉劉出位。
郭校長睇嚟係有意思大力改造城大，睇報紙消息，城大以後會好注重教授級教師每年發表學術論文，嚴格稽核，無論文者，就轉職為導師，可以只教書不做研究。呢股風氣，城大吹起，相信理大嘅新校長唐偉章亦感覺到競爭壓力，不會靜觀其變。以前理大林副教授批評本港大學過份重視研究，以後唔知仲有冇時間在報紙發表評論文章呢？
香港嘅大專校長，除咗教育學院嘅張炳良教授之外，全部自美加回來，彼邦素來注重publishorperish之風，各位本地校長習慣咗嗰一套，對唔做研究，唔寫論文嘅教授會睇唔順眼！吃學術呢行飯，以為在大學做教授係高人一等嘅優差，錯之又錯。