馮仁昭四圍超：
衞蘭為Amusic平反救Jill冇停過 - 馮仁昭

衞詩被囚第50日--噚日係樂壇姊妹花衞蘭（Janice）衞詩（Jill）嘅27歲生日，本應開開心心，可惜二人相隔兩地。阿Jill因涉嫌藏毒俾日本警方拘押喺東京，今日啱啱第50日，眼見妹妹孤伶伶過生日，Janice都想靜靜咁過算數。

留家獨過生日

又難怪Janice心情咁差嘅，之前有傳Amusic「棄詩保蘭」，對阿Jill生死不聞不問，日前Janice終於忍唔住，喺fans開設嘅論壇破天荒留言，用英文寫咗篇題為「Mythoughtson……」嘅文章，劈頭第一句就幫公司澄清，話公司一早搵咗律師陪住Jill，等佢可以平安返港為止。
Janice又希望fans唔好一味批評Amusic，因為咁會搞到佢好心痛，佢好激動咁話：「公司每一位同事都很關心我的妹妹，並想盡辦法令她可回家而不需面對嚴厲的法律制裁。」然後又話關楚耀可以平安無事返港，細妹冇同佢一齊，Janice都覺得好懊惱，惟有寄望律師幫到阿Jill手。
另外，噚日大批傳媒到Janice位於大埔道嘅寓所守候，一直未見佢出動。Amusic話同Janice提議過一齊食飯慶祝生日，但Janice想靜靜咁過，所以都尊重番佢喎。