泰國局勢急轉直下，上次因為包機問題被人鬧到九彩嘅特區政府今次學精咗，保安局局長李少光剛剛喺潮州打完波仔落嚟，嗱嗱臨喺晏晝5點幾見記者，發出旅遊警告；運輸及房屋局局長鄭汝樺都有份出招，派手下早喺上個禮拜，已經搵定航空公司負責人研究緊急應變計劃。
應變計劃都離唔開加多啲航班、安排包機呢啲指定動作。知情人士話，運輸局官員首先要掌握每日來往曼谷同香港嘅航機有幾多機位，再摸清必要時航空公司願唔願意同政府合作疏散港客，之後再將情報同保安局分享。
度緊假都要掌握局勢
有咗上次包機冇人搭、搭咗又拖數嘅慘痛經驗，今次喺資訊發佈同管理上應該會有啲改善，至少政府官員唔會好似上次咁，混淆航空公司包機同政府包機。
保安局中人就話，李少光復活節假期間雖然去咗內地度假，但都要同香港呢邊保持緊密聯繫，掌握局勢發展，好似向泰國港客發出短訊消息等決策，佢都要參與，噚日聽到當地開槍，港人生命可能受威脅，就決定發出旅遊警告。不過，李少光冇因為要趕返香港見記者而縮短行程，因為佢原本都係計劃噚日返香港，今日返工。