早排阿鳳上網睇龍震天師傅個Blog，諗住偷學番兩招玄學秘技，點知龍師傅唔講風水講湯水，仲話灣仔得成閣雀局小菜有翅有湯兼有魚，唔打牌每人都只係六十幾蚊，搞到阿鳳拉住我話要去。我哋班揸搵食車嘅，日踩夜踩都係為兩餐，尤其係開緊工嗰餐，坐低食個靚飯、同行家吹吹水，真係減壓不少。有好地方，梗要預埋老死Laughing哥同孖三孖八。點知佢哋話我Out，原來得成閣晚市除咗雀局菜外，最近樓上搞埋打邊爐，$1海底椰或鯊魚骨湯底，配料份量足又夠鮮，埋單人頭計約$80，最緊要係凌晨三點先打烊，莊士敦道周圍都唔係禁區，吹雞消夜實有位泊車。
文：黃師傅
地址：灣仔莊士敦道灣仔商業中心2樓（25723316）