不可思議，個個變姿色份子。賣歌不賣樣的謝安琪（Kay）近日榮升樂壇天后後，連樣貌都變成天后級。有虛報年齡前科的阿Kay，昨日出席活動時例牌否認整容之說，只稱全賴化妝師的神乎其技，據悉月前曾接受眼部手術的變臉天后，昨日刻意化上smokeyeyes濃妝到場，似是有意遮掩其疑似割雙眼皮的刀痕。
出道4年的謝安琪去年憑一曲《囍帖街》榮升樂壇天后，工作排得密麻麻之餘，舉手投足都盡顯自信。然而人紅自然是非多，近日又有消息指她變臉，指她的雙眼近日離奇變大，雙眼皮越變越深。
「我要多謝化妝師」
阿Kay昨午以活動大使身份現身奧海城，出席「網絡齊關注行動2009」時，輕鬆地否認整容，其心情更是靚到絕，台上與學生分享上網心得，台下則與觀眾合照，還主動向久等的傳媒道歉。
由於阿Kay被指割雙眼皮，現場傳媒以長短鏡集中拍攝其眼部特寫，不過阿Kay昨日明顯有備而來，除刻意化上smokeyeyes濃妝外，還加上長長假眼睫毛，正面觀看根本看不清楚傳言所指的雙眼皮刀痕。對於被指變臉，阿Kay語帶輕鬆地說：「整容講咗好多次，我要多謝化妝師，無論化妝同身形各樣嘢都好咗，畀人感覺靚咗，其實係好多嘢嘅配合。」然後她企圖借以往曾被指暴食肥胖來帶過話題。
記者追問阿Kay現時有沒有整容的必要時，她苦笑說：「唉，講到我以前好似外星人，感覺好似羅茲威爾，好似每一part都要割一割咁樣，其實我覺得唔需要，主力唱好歌就算㗎啦。」阿Kay除承認箍過牙，表示眼、耳、鼻全沒修葺過，但她現時的相貌的確跟她05年出道時相差甚遠，當年她五官較扁平、雙目無神，如今卻眼大面尖鼻高，若真的如她所說全靠箍牙所賜及化妝師的變幻術，實在太匪夷所思。
認整容唔係壞事
曾在舊歌《姿色份子》中諷刺女性為了自尊而整容的阿Kay，昨日談到是否贊成整容時卻持另一態度，她說：「自己冇乜意見嘅，我覺得呢啲都係個人選擇，如果承擔得起風險同錢，咁我又覺得唔係壞事嚟嘅。」她又坦言這一刻雖然沒想過整容，但將來老了，會去想是否需要執一執。
此外，提到阿Kay今年勁賺近千萬，她表示沒有查問收入有多少，故無法回答。
採訪：馬建華
攝影：黃偉雄、葉君海
娛樂資料庫：變種藝人之兩極面孔
藝人靠面孔搵飯食，執靚副架生討好fans亦不為過，但一眾變臉男女抱着寧俾人見莫俾人知心態，即使離奇變索仍口硬不認，最常用的變臉理由就是──箍牙。
Angelababy
o靚模Angelababy出道前孖膶腸嘴兼哨牙，與現時的索樣判若兩人，但她聲稱那時babyfat，加上箍牙致面腫，乜上述原因真係會搞到膶腸嘴㗎？
傅穎
染金毛戴大眼仔扮日本妹的傅穎，眼耳口鼻及身材跟7年前判若兩人。從前身材扁平、鳳眼的她，現在兩眼又圓又大，上圍升cup，大眼仔威力咁大？
楊秀惠
因歪面人氣急升的楊秀惠，近年包包面消失，下巴變尖，有傳她因打botox失敗致歪面，當事人照例否認，還說正試用一隻全新瘦面產品所致。
江若琳
玉女江若琳出道前面腫眼細兼哨牙，投身寰宇旗下後脫胎換骨，變身大眼玉女，面尖尖迷倒不少電車男，她說一切拜箍牙所賜。
容祖兒
99年初出道的祖兒，鼻扁、口闊、兩眼相距三丈遠，走紅後越來越四正，下巴變尖、鼻變高、面變瘦，她解釋是因為瘦了才令五官變得集中。
周汶錡
名模周汶錡初出道時pizza面、鼻扁，貓步行得多人都索咗，腮骨收細變瓜子面，闊鼻變高鼻，她解釋因箍牙後水腫及babyfat消失才變臉成功。
林峯
林峯越睇越靚仔，昔日鼻樑扁鼻頭圓，現在則鼻樑高挺，連雙眼皮也加深了，他說：「我有鼻敏感，我個鼻係腫咗，係感冒未清啫！」信焉？
資料來源：《蘋果》資料室
特稿：漸進式整容難逃法眼
娛樂圈整容成風，早已見怪不怪，早在粵語片年代，女明星已開始整容。其實整容真會上癮，經常會覺得仍有不夠完美之處，如三色台大姐大就是一個例子，她由扁鼻變高鼻後，又覺得日久變形不夠好，於是多次修整，每次整少少，以為神不知鬼不覺，但事實當然是好覺啦！基本上她都是在香港找醫生做手術，10多年越整越厲害，外界人也越看越不順眼，朋友都勸她不要再整，但她已經無法停下來。
樂壇天后也是出道後開始大整容，同樣是每次修整少許，實行醜女大翻身，她光顧的中環名醫又的確幾好手勢。
香港有不少電視台藝員喜歡光顧中環某矯形名醫，他收費也不算很貴，割雙眼皮收費約2萬，隆鼻約3萬至6萬。不過近年藝員興起到台灣整容，因收費較香港便宜一半，如三色台小生「高山」就是數年前去台灣做手術的，他的鼻子在台灣動刀後高削不少，聽聞他覺得台灣技術不俗，還介紹了三色台某女高層去整雙眼皮。
撰文：丁寧