上個月滙控（005）喺競價時段被質低到33蚊收市，證監會即時話會搜集數據，研究有冇違規行為。正所謂道高一尺，魔高一丈，證監成日都要實邊個搞嘢，所以最近搵班大學尖子幫手，打擊違規行為。
話說澳洲政府資助嘅金融資本市場合作研究中心，孖住香港證監會一齊頒發130萬銀獎學金，畀城大兩個博士生馮志揚同黎鶴賢，等佢哋喺未來3年，用嚟研究運用人工智能等高科技，監測操控市場嘅違規行為，其間證監仲會派人畀啲專業指導。
馮志揚主要研究金融智能系統，佢話家陣成交額不斷增加，加上全球化令證券市場變得複雜，要有更先進監測技術，同時睇埋外國市場，先可以掌握一啲跨境嘅市場違規活動，而呢項研究有證監畀意見，可深入了解個系統喺商業上嘅應用。至於黎鶴賢曾打銀行工，話打工嘅經驗幫佢了解股市運作。