「嘩！靚仔到呀！」電影《賭俠》入面星仔同刀仔對住大儍等惡人，情不自禁爆咗出嚟。英國《太陽報》近日亦推出球壇最惡劣髮型選舉（簡稱惡髮），愛華頓紅人費蘭尼躋身第9位，果然人紅特別多人留意。
肥哨河童頭居首
呢個「惡髮選舉」排頭位係02年世界盃朗拿度個「河童頭」，「金毛獅王」華達拉馬次之，第7位係02世界盃碧咸個Punk頭，認真攞膽！第8位係占士06年個蛋撻頭，其餘排名讀者們自己睇啦，反而我求大俠想講吓第9位費蘭尼個麥當勞叔叔頭……
髮型最緊要夠潮、夠型，呢個比利時農民費蘭尼，居然整個70年代搖滾明星嘅爆炸頭，好似英國樂隊Queen嘅結他手BrianMay同LedZeppelin嘅結他手JimmyPage咁。不過唔係個個球迷好似求大俠咁懷舊，所以每次睇愛華頓嘅波，心入面都講：「好心鏟咗佢啦！」
不過，落到場最緊要好波，費蘭尼今季以1,500萬鎊（約1.7億港元）由標準列治加盟，聯賽以7個入球列球隊次號射手，火速上位好對辦！周日3:3被維拉迫和，呢位比利時國腳同樣先拔頭籌，唔係對方66分鐘博到問題個12碼，愛華頓一早就3分到手啦！
愛華頓兵「髮」力無邊
愛華頓隊波好有前途，咁啱好幾位主力亦係「惡髮」人士，好似曼城借將祖奧同英格蘭國腳尼史葛，尤其前者喺1月加盟以來聯賽已入咗5球。可惜，愛華頓領隊莫耶斯講明祖奧季尾借用期滿要返曼城，因為畀唔起1,800萬鎊同佢贖身咁話。
我求大俠就話莫耶斯偏心費蘭尼就真，點解？原來莫耶斯後生打些路迪嗰陣，個髮型抄足澳洲音樂組合TheBeeGees，同費蘭尼一樣對70年代音樂咁熱衷，梗係錫到燶啦！祖奧想留低就要轉吓髮型喇，咁就可以「Ah,ahahah！Stayingalive！」㗎喇！