投資銀行生活慘無人道，呢個亦都係投行人工咁高嘅原因之一。有位投行朋友私下向華華訴苦，佢話個仔出世，可惜因為工作太過繁忙，搞到個仔3個月大，佢只係見過阿B仔一次，提起呢件事佢仲眼泛淚光。
驚趁人少做手腳
投行中人假期返工好平常，星期六日返工更加已成習慣。不過，有位歐資行嘅朋友同華華講，佢哋公司最近唔歡迎員工周末返工，更絕嘅係，公司門口員工證打卡閘口仲Lock埋，員工「嘟卡」都入唔到，想做勤力員工都唔得。
「有冇咁筍呀？」華華同各位讀者一樣脫口而出。「唔通投行管理層終於關心吓員工嘅生活？」
「錯！」歐資行朋友解釋，原來公司嘅風險管理部覺得，經歷過馬多夫、霸菱銀行等事件後，驚有員工會趁星期六日公司少人，喺電腦或文件上面做手腳、篤數等。公司覺得博唔過，所以就謝絕員工周末免費OT，你估真係為員工着想咁好咩？