話拆又未拆，過了3月，牛頭角下邨仍然安好，不止街坊緬懷，不少後生仔也去朝聖，右手一部單反相機狂攝，左手一包雞蛋仔。下邨作為現存最後一個徙置屋邨，1969年至今已40年歷史，從街口炸雞髀用的大油鑊、紅紅炭火燒出來的雞蛋仔、到螢光橙色的墨魚……都記載了不同的故事。童年時在下邨讀書的胡杏兒，就最懷念每朝去食早餐的興記茶餐廳。
記者：吳允冲
攝影：陳陶鈞、伍慶泉
街市牛頭最驚嚇
小學時期，杏兒在下邨的柏德學校讀書，每日從德福花園的屋企行返學。「我喺下邨讀書，阿嫲又住10座，所以成日喺下邨玩。每逢長周，禮拜六朝早返學都經過街市，入面有個牛肉檔，總有一個無晒皮但係有眼嘅牛頭擺喺度，細個好驚，次次經過都扮睇唔到！」想不到，杏兒對下邨的回憶，是驚嚇居多。「聖馬太小學隔籬有個大球場，每年鬼節都有盂蘭勝會，好多時都會去睇神功戲，嗰啲鬼王起到好高，明明好驚又要拉住家姐去睇。」
上年母校搬遷前，杏兒特登回去探老師和舊同學。「返到去環境同以前差不多，但樣樣都好似縮咗水咁!我以前成日飲水的飲水機都縮咗水！最記得有個同學仔叫林祥發，球場隔籬有間裙褂舖係佢屋企開，上次返去都仲喺度，我有特登去搵佢。」林祥發，你還記得胡杏兒同學嗎？
杏兒的味覺回憶
早
「我返下晝班，成日都到興記食早餐，最多係食火腿通粉煎蛋多士，加一杯杏霜或者horlicks（好立克）。有時又去粥檔食粥呀蘿蔔糕呀腸粉呀……」上年杏兒故地重遊，去興記食她至愛的茶餐，「味道無變過，環境都好相似，鐵皮屋頂、卡位都很懷舊。唯一分別係多咗冷氣。」
午
「放學之後我最鍾意去買嘢食，魚蛋、碗仔翅、炸雞髀呀……下邨太多嘢食啦！我成日都食pancake嗰種……夾餅！雞蛋仔？嗰時唔係好興，貴嘢嚟㗎！有時又去士多買食鬼、乖乖，以前好興㗎﹗」
晚
「夜晚好多時都會一家人落去食飯，我記得有一間喺球場附近……橙色門口……可以上2樓㗎，成家人會去食潮州麪，食打冷，韭菜豬紅、蠔餅，有時又會去大牌檔食海鮮食東風螺、炒蜆。」
杏兒牛下足迹
新城DJ下邨話當年……
路芙最愛牛雜麪
「我中學阿sir喺下邨開文具舖，雷sir鍾意叫啲靚女同學一齊去玩，無奈總有我呢個男人頭跟住。間舖好細，我淨係幫襯過佢買一嚿擦紙膠。畢業後做唱片公司宣傳，成日去淘大碌lane，總會過來食碗牛雜麪。」何興記的牛雜在下邨有名，牛丸大大粒好彈牙。下邨將拆，可有不捨得？「牛下真係香港icon，好應該留番一棟做個記錄，改建成其他建築。」
何興記（27570469）
下邨11座
Puppylove甜蜜奶茶
紫桐中學時就同男朋友仔來飲奶茶：「中六時，我同男友喺牛頭角補習，次次都去鐵皮屋茶檔食蛋撻飲奶茶，價錢平又好味。家每次經過，都會諗番以前的甜蜜回憶。」下邨很多茶記都在門外搭個鐵皮屋，擺多幾張枱做多啲生意，像69年開業的鳳凰冰室，食物即叫即做，公仔麪的湯都自家熬製，價錢也像「回到過去」，一個套餐$22，已有炒意粉煎蛋多士飲品。
鳳凰冰室
下邨11座11號地下
定情豬雜米線
科林由細到大在下邨蒲，「媽咪一家住10座，下邨最有特色係豬雜麪，我每識一個女友，都帶佢嚟食。」帶過幾個來？「都有……六個……」女友藐，科林不理，「唔鍾意食我都要逼佢食！」源發由何興記老闆女兒86年所開，科林推介必食豬雜或蝴蝶腩米線。好在源發早在對面牛頭角道開了分店，科林識了新女友，都可繼續食豬雜。
源發潮州粉麵（27595010）
下邨第10座地下10號
踢拖篤燒賣
Gigi自小與婆婆住在13座，「我記得口總有幾檔車仔檔，賣魚蛋、燒賣、格仔餅同橙色墨魚，我最鍾意踢住拖鞋去食燒賣。」木頭車仔已少見，像「二家姐」在下邨已40年，由大牌檔到後來推車仔賣點心，只有魚肉燒賣、山竹牛肉和粉果。魚肉燒賣味道驚為天人，又綿又彈牙，配二家姐自家調校的豉油更正。
好味道
下邨美食街內