商品大王羅杰斯睇好中國，除咗畀兩個囡囡學中文，連佢親自授權嘅全球首部傳記《水晶球》，都交由內地《北京青年報》記者楊青操刀。部新作出爐冇耐，羅杰斯上周二帶部新書喺北京見傳媒，例牌帶埋佢位5歲兼講得一口流利中文嘅千金樂樂，話自己喺中國最成功嘅投資就係女兒，畀佢學中文，樂樂啱啱出世嘅妹妹都學緊咁話。
對於中國經濟預期，羅杰斯話係基於自己對中國嘅了解，喺華爾街嘅經驗話佢知，「專家」的話通常係錯，要睇心目中真實嘅世界，最好自己去體驗，好多投資機會係透過日常觀察。由80年代到90年底，佢曾3次揸電單車橫越中國，90年嗰次見到牧民走晒去起鐵路，唔再放牧，於是打電話返美國叫同事買毛衣過冬。
喺各國爭印銀紙嘅時勢，羅杰斯已預言嚴重通脹難免，仲提醒消費要趁早，佢老人家話：「如果房屋要裝修，最好家就做；要做手術，現在就做！」言下之意，即係話有病都要趁早，喺通脹環境下連病都唔遲得囉。最後佢仲不失商品大王作風，叫人買商品保值，話表現應該比股市好。