卿姐早前喺港大,同被指係「隱形左派」嘅港大學生會會長陳一諤激辯六四,令唔少學生更關心六四嘅歷史,中大、理大近排都相繼邀請卿姐去大學,出席六四論壇。其實都要多謝陳會長,全靠佢,六四20周年嘅氣氛未到5月已經咁熱烈。民主黨今個月26號都會喺旺角搞六四街頭論壇,由於89年當日就係《人民日報》發表四二六歪論嘅日子,卿姐話諗緊係咪要搵部電視,喺現場播番當年呢段歷史。
卿姐呢排咁紅,難怪佢諗住喺嚟緊嘅書展推出新書。卿姐對本書嘅內容保持神秘,只透露書名會叫《我在民主黨的日子》。吓?咁快!卿姐坦言,雖然入黨未夠半年,但短有短寫、長有長寫喎。