牛頭角下邨快將清拆，近排不少拍友湧去拍照留念，儼如一個旅遊景點。「遊人」眾多，促使房署要發聲明勸喻請勿擾民，難怪，下邨對不少港人來說，是個活生生的屋邨生活展覽館，無論邨內人邨外人，都有他們的牛下回憶和味道。
記者：王震遠
攝影：周旭文、部份照片由受訪者提供
老街坊
阿麗
在牛頭角生活了三十多年的老街坊阿麗，最懷念從前街邊小食，「以前9座條食街最多嘢食，小食、粥店、打冷都有。」下邨住了很多潮州人，阿麗就是其一，「以前喺球場會做神功戲，潮州人最鍾意睇，後來球場越縮越細，無繼續做。」潮州街坊多，潮州粉麪當然最受自己人歡迎。「潮州人好多都唔食牛，覺得牛有羶味。」源發主打豬肉，以蝴蝶腩（豬肺）最聞名，她吃了碗豬肺河粉，「豬肺入味又唔韌，河粉唔易散，湯底好清好有味」。
源發潮州粉麵（27595010）
下邨10座地下10號
邨內人
Leo
幾年前搬到秀茂坪的Leo，在上邨住了廿多年，但上邨少食肆，他便常到下邨開飯。回想當年一樁笑話，下邨有間名叫「意大利」的餐廳，卻沒有意大利食物，真身是茶餐廳！Leo常到下邨大牌檔金利來，「十幾歲先第一次嚟呢度食飯，通常參加活動比賽完嚟。」大牌檔是他和朋友的吹水地，也是和女友撐枱腳之選，「最記得呢度嘅沙律芝麻大蝦球，因為……前女友鍾意食。」
Angel
Leo的家姐Angel，屋邨生活最開心是掃小食，「細個時儲咗廿蚊就去13座掃晒咁多檔，有螺肉牛雜食好開心！」Angel也愛金利來食物好份量多。「呢度食飯可以高談闊論，老闆又會埋嚟傾吓偈，人情味濃，唔似大集團，講句多謝都係機械式對白。」特別記得這裏的水煮肥牛，「有次5點幾嚟門都未開，老闆照放我哋入去，叫咗水煮肥牛，請夥計開冷氣，夥計忙，催咗兩次，返轉頭熄咗部電視──佢記得要幫手，但忘記係咩事！」雞毛蒜皮的一段段小笑話，日積月累成了濃濃的下邨味道回憶。
金利來食坊（27990125）
下邨12座地下5-6號
邨外人
Ronald
在下邨度過14年童年，知道舊居快清拆，Ronald趕緊重返舊地。8年前他住在14座，「家家人都打開木門，同左鄰右里親密啲。」屋邨學校總有一間心水麪包店喺左近，「以前汗牛書局隔籬有間麪包舖，返學放學一定食。」麪包店早已不在，這次他試了豬扒包，「肉質好腍又香口，個包好軟熟。」
阿欣
從沒踏足下邨的阿欣，看電視得知下邨清拆，特意來感受一下舊區氣氛。「搭車經過，見到小巴站好多走鬼檔，有牛雜又有碗仔翅。」阿欣初試下邨街知巷聞的豬扒包，「唔係用沙律醬而係茄醬，比外邊的特別，豬扒又夠腍。」初次的滋味，也是最後的牛下滋味。
興記茶餐廳（27597224）
下邨10座地下11-12號
