入境處近日正值「菲」常時期，除咗要密切留意泰國局勢，睇吓使唔使營救港人返港之外，仲要為副局長蘇錦樑用卡片撻朵幫菲傭續期呢件非同小可嘅事件解畫，但點知越解越亂，加上有自稱入境處「老鬼」踢爆，話入境處一向有為招呼達官貴人而設嘅「蟲case」，令公眾「滅蟲」之聲此起彼落。
組團去上海上國情班
上星期入境處副處長趙偉佳喺電台節目自爆，話過往有三成菲傭續期申請，都未必要提交足夠證明文件。佢呢番說話真係「捉蟲」，講出嚟俾各方議員狂轟。冇見幾日嘅趙sir噚日又再露面，但唔係為自己「捉蟲」或者「蟲case」解畫，而係政府新聞處發稿，話佢接見入境處十人代表團，趁佢哋今日飛去上海，參加為期8日嘅香港紀律部隊國情研修班前，面授機宜。
呢個國情研修班由中聯辦警務聯絡部安排，喺中國浦東幹部學院舉行，由署理首席入境事務主任（部隊管理）馮明強做領隊，團員包括1名署理總入境事務主任、4名高級入境事務主任、兩名署理高級入境事務主任及兩名入境事務主任，都算人馬叠叠。
據報研修班涵蓋嘅題目包括歷史文化保護、城市規劃同內地公安體系等，但冇講會唔會同相關部門交流一下處理「蟲case」嘅心得，可能覺得呢啲「雕蟲小技」都唔使交流，反正大家都係咁做。
不過，蘇錦樑呢次一石激起千重浪，入境處仲有排煩，除咗立法會政制同保安兩個事務委員會都會跟進，仲陸續有人向傳媒爆料。八方噚日就收到有讀者話，98年7月趕住換成人身份證，屋企人話識得當時啱啱由入境處處長升任保安局局長嘅葉劉淑儀，三日後佢就可以去入境處辦手續，當晚即刻飛去澳洲升學。
有熟悉辦證程序嘅人話，一般嚟講只要入境處有空檔，最快係可以預約一、兩日後去到辦證。葉太就透過發言人回應，10年前嘅事真係唔係好記得，但覺得以上個案根本唔需要用酌情權。如果真係有特殊情況，入境處都可以運用酌情權，估計係誤會喎。
mailto:[email protected]