【第28屆金像獎之男配角篇 倒數第5日】林家棟入行21年，在無綫拍劇14年，隨後跳到電影圈發展，最大成就是模仿張學友令觀眾留下深刻印象，抑或是提名過兩次金像獎最佳男配角呢？其實這些都不重要，由電視台做小生當主角，到拍杜琪峰電影變成sidecast──綠葉，這一切都未能磨滅家棟的雄心，他仍渴望像梁朝偉般摘下金像獎最佳男主角獎，又或是當上導演，就算未能進軍荷李活，也想進入內地市場由合拍開始，一步一步地向上攀。
憑在《葉問》中演任日軍打罵的李釗，獲得提名第28屆香港電影金像獎最佳男配角，家棟不諱言渴望得獎，他說：「我渴望，但唔係100%信心。」要求他評價其他對手，「我冇睇過《証人》，唔知佢（廖啟智）做成點，但佢哋各有實力，張豐毅我細細個就睇佢嘅戲，星爺（周星馳），應該有500萬港人都睇過佢做戲，今次係睇佢點處理同小朋友嘅關係，好難界定星爺係主角定配角，但佢係《長江7號》嘅靈魂。」家棟客套地說。
睇好樊少皇
其實4位對手之中，他最看重的是樊少皇，家棟說：「我對樊少皇個角色好有遺憾，因為大家同一部戲，所以我知道情況，少皇做個北方人，佢喺對白度落咗好大苦功，唔係個個都講到但佢得，因為剪咗某部份少皇嘅戲，所以觀眾睇唔到某啲變化對比，我buy佢㗎。」
重提往事，家棟說當年在無綫拍完《大鬧廣昌隆》、《茶是故鄉濃》後，自信心開始膨脹，再拍多部《酒是故鄉醇》更加心急，認為自己可以走出去變成獨當一面的林家棟，怎料一切卻非想像中的一回事。家棟說：「出到去之後，電影市道差，01年個市下跌得好厲害，參與電影機會少咗，十部戲開冇一部有我份，惟有同自己講市道唔係我控制到，坦白講，我出嚟嗰時真係有輕狂過。」
等做第一線
不過家棟認為縱有任何事也沒磨滅過意志，他輕笑兩聲然後說：「我想做一線㗎，慢慢等囉！蚊型製作我都揹得起啩，我會慢慢等爭取表現，好似我拍到《葉問》，俾人認識到我係識得演戲嘅林家棟，有觀眾認受性，葛優、姜文甚至張豐毅咁，內地觀眾都好buy。所以我想攞男配角，影帝邊個唔想要，每樣都會盡力爭取，我仲有目標想做導演做監製拍戲。」
用綠葉這個形容詞套在他的身上，家棟明顯有點抗拒，他駁斥說：「可能香港觀眾有呢個諗法，唔係話你個角色綠葉就係枯黃，如果真係有呢個定位我好無奈，應該有人會覺得呢個係負面形容詞。」鬱鬱不得志？家棟說：「又冇，計到數，外形唔夠，觀眾群又唔夠人多，我話自己得有幾難，要觀眾話你掂至得。係做咗廿年，冇所謂喎，只要呢份係你終身職業唔怕長。我又唔係嗰啲賺一年錢拎去炒樓等發達嘅人，做自己鍾意嘅事，做錯冇所謂，起碼自己試過，唔好諗自己以前拍劇有幾成功，唔係你問題，電視台有策略，搵你去拍都係試吓得唔得，緬懷過去原地踏步就出事，我係咪過份清醒呀？」
採訪：魯萍 攝影：仇志德
化妝、髮型：JessicaYuenofOasisSalon
場地：Spasso
其他男配角提名
影評人之選
星爺降格爭獎有暗湧
周星馳憑《長江7號》降級提名最佳男配角，力敵《葉問》的林家棟和樊少皇，雖然勝算被看高一線，不過影評人林娉婷卻批評他神態造型不像民工，反而看好林家棟，因為該角色設計特別，非常見那種大奸大惡的漢奸，而是一個好人，家棟也拿揑準繩，演得比甄子丹及樊少皇更出色。
另一位影評人馮家明則看好演技精湛的廖啟智會憑《証人》奪獎，戲中智叔飾演老差骨，一直等退休，有點老油條味道，可是遇上急進躁火的上司謝霆鋒又百般無奈，後來謝霆鋒連累他受傷變跛，兩人在練靶場再遇那場，智叔演活了不知該生氣還是原諒的矛盾心情。