估唔到飄移友連凌志都唔放過，豪花80萬將GS（Aristo）大變身，全車足足偷輕433kg，連日本有「真人版拓海」稱號嘅谷口信輝，喺珠海試過以超過200km/h拉橫架車後，都忍唔住勁讚：「改得仲好過我嗰架！」
記者：徐影龍
谷口信輝有份改
花咗四個月將架Aristo全改，時間唔算長，但車主James乜都要完美，搞完底盤搞引擎，幾萬蚊買架舊Aristo返嚟，最後不知不覺花近80萬改裝，聽落有啲瘋狂，「其實我係參考織戶學同谷口信輝嘅Aristo嚟改，佢哋D1大賽有咁好成績，我都想試吓。最令我自豪嘅，係改完出嚟比谷口嗰架輕多63kg，差唔多一個成年人體重，呢個差距都幾大㗎。」
講開谷口信輝，呢位日本公認嘅真人版拓海，細細個已經幫屋企送豆腐，一送就係16年。之後拜師織戶學門下玩賽車，由房車賽GT300到飄移賽D1，都有好成績，今番拉大隊遠渡珠海，就係為咗同James合力改好架Aristo。
硬度僅次鈦金屬
到最後測試時，谷口即場表演一幕以高於200km/h速度、由T14彎一直飄到T1彎嘅神技，當時全場嚇到以為谷口失控出事，最後佢以同一速度、飄移幅度嚟多一次，證明唔係符碌過骨。玩到200km/h、5波彎咁激，谷口都忍唔住讚James架車改得仲好過自己。成功偷輕，幕後功臣主要靠底擔，今次由鐵換上鋁合金，金屬編號7075，比同屬鋁合金嘅6000系列更強，僅次於穿梭機用嘅鈦金屬，「其實仲要加焊，某啲位要點焊得更硬，以前點得唔靚，Tune極架車都唔理想，後尾得谷口嘅工程師岩田先生指點，原來太硬又係唔得，要適當地方保留番彈性先好揸。」
引擎方面，James唔用新偈，專登四出搵副舊Engine返嚟加Turbo，「因為新嘅Aristo用咗VVT-i技術，局限咗Cam嘅角度，對飄移會有所阻礙。」講到最大夢想，James話希望有朝一日能企喺冠軍台上，聽住奏國歌！
師徒對決
年紀問題，織戶學雖退下GT500火線，但寶刀依然未老，跟徒弟谷口信輝鍊番轉下坡道飄移。YouTube呢段片睇到谷口出力猛放，但織戶拼命死咬，過程緊張刺激到極。
網址： http://www.youtube.com/watch?gl=TW&hl=zh-TW&v=xjnc8cgury8&feature=related
