教會內推動傳統禮儀嘅團體邀請陳日君主持噚日嘅復活主日大禮彌撒，結果變咗樞機最後一次以教區主教身份公開亮相，除咗吸引大批記者來採訪外，亦有唔少教友慕名而至，想體驗吓傳統嘅彌撒。
陳日君主持呢個特倫多拉丁彌撒，除咗福音同講道之外，全程以拉丁文進行，有啲部份仲要係主祭默念，唔少教友拎住本彌撒書神情迷惘，唔知幾時企幾時跪，結果成間聖堂幾百人，同一時間有人跪有人企亦都有人坐，有人聖體都未祝聖就想行出去領。
平日彌撒念「羔羊頌」時要自搥心口三次以示悔罪，但因為唔係太多人知念緊乜，幾乎冇人咁做。雖然場面有少少混亂，不過事後八方問番班教友，原來大家對傳統禮儀都感到好奇，雖然唔識唱拉丁文聖詩，不過都覺得好好聽。