黃婉伶（Race）憑電影《性工作者2我不賣身．我賣子宮》，獲提名本屆金像獎最佳女配角。戲中飾演懷孕新移民的Race坦言是一大新挑戰，而且戲中與影帝黃秋生合作，背後的壓力相當大。
黃婉伶於第24屆金像獎憑《死亡寫真》提名最佳新演員，結果當年由主演同志電影《蝴蝶》的田原奪獎。於第42屆金馬獎中，Race再逐最佳新演員，結果又落敗於《頭文字D》的周杰倫手中。雖然得到兩個頒獎禮的提名，結果都是中空寶，Race輕輕以一句「係你就係你嘅」總結自己的心情。
Race更透露了一個秘密，她說：「當年有個記者同我講，金馬獎本來係我贏，但係當年要推廣台灣電影業，所以畀咗周杰倫，我都唔知係咪真嘅，不過獎呢啲嘢冇得強求，有提名已經係一個肯定，我都好開心。」
獲提名好榮幸
今年Race獲提名最佳女配角，肯定不會再敗給周杰倫，她興奮地說：「今次提名嘅對手好強，個個都好有經驗，有得同佢哋一齊提名已經好榮幸。記得當日收到公司同事sms，我好開心，第一時間話畀家姐同媽咪知，佢哋都讚我叻女。」
在《性工作者2我不賣身．我賣子宮》一片中，Race飾演一名懷孕的新移民，丈夫過身後獨力帶着一名兩歲女兒，對嬌滴滴的靚女Race來說的確是一個新挑戰，事前就連有份參演的森美都不信她可以演繹當中的神髓，她說：「森美事前同我講劇本入邊個女人好惡㗎喎，完全都唔似你，你做到咩？其實我都有好惡嘅一面，只係冇俾人發掘出嚟。最記得開拍第一日就要不停鬧人，拍完之後聲都沙晒。」
遇秋生有壓力
由於Race於戲中要與小朋友合作，令演戲的難度又增加不少，她說：「有一場戲我要打個小朋友，我真係唔忍心打落去，為咗逼真我冇辦法唔打，拍完呢場戲之後，個小朋友第二日一見到我就喊。同埋我呢個角色好似個癲婆咁，因為老公又唔喺度，自己大肚又要湊住個小朋友，成日都吵吵鬧鬧，有時拍完返到屋企情緒都冷靜唔到落嚟。」
除此之外令阿Race感到壓力倍增的是與影帝級人馬黃秋生演對手戲，故此她事前一早做好準備，她說：「我聽聞秋生係一個好嚴厲好認真嘅演員，第一日拍戲之前我做好晒功課，背好晒對白，去到現場冇睇過劇本。之後聽到秋生同導演講『咁識搵呀，咁好彩畀你搵到個唔係偶像嘅』，我聽到都好開心，我都希望有機會再同佢合作。」戲中的女主角是劉美君，Race亦大讚對方演技精湛，她說：「未埋位前佢表現得好輕鬆，但導演一叫action佢即時入晒戲，我覺得佢真係好犀利呀。」
對於奪獎機會Race坦言不會抱太大期望，因為入圍的對手相當強，所以她不會事先寫好致謝辭。可能之前競逐新演員時撲空，令Race對奪獎的信心不大，她續說：「上次入圍新演員信心大啲，因為好多人都話我做得好，又話投咗我票，最後都係落選，今次唔諗咁多啦，贏到口碑最重要。」
採訪：李珮洳
攝影：陳慧安
髮型：TavinLin(HairCulture)
服裝提供：Zucca
場地提供：ThaiLemonGrass
其他女配角候選名單
影評人之選：陳麗雲沉實有層次
要影評人選今屆最佳女配角，電影評論學會理事鄭傳鍏認為《天水圍的日與夜》的陳麗雲呼聲最高，他指出《天》片本身沒有很戲劇性的情節發生，如果獨居長者這個角色落在其他演員手裏，可能會用很煽情的方式表達，但陳麗雲卻用了內斂、沉實的演繹方法，令角色更有層次，特別是與女婿見面及跟鮑起靜母子來往那段戲更加出色，這種沉實的演技在現今港產片中已十分少見。