中渝置地（1224）喺最近三年低位，橫行咗大半年，又係冇乜郁過，加埋中長線受惠西部大開發，中渝要實。中渝08年度（12月底止）蝕咗8億銀，但年度就要為物業、預付土地租金等作出減值10億銀，幾乎全部係非營運性虧損。
買股買前景，要咁睇，中渝主打祖國西部內房業務，手頭土儲高達9900萬平方呎，足夠未來7、8年發展。呢期有關重慶發展嘅「3號文件」出台冇耐，確立重慶係西南部經濟中心。加埋西部大開發，亦係祖國大計之一。受惠重慶及西部發展，連埋中渝充足嘅土儲，中長線應該肥仔水。保守以中渝土儲每方呎增值/獲利100蚊計數，講緊每股增值，係4蚊樓上，NAV已經可以起過孖，上到8.9元，中渝現價不過2.09元。中渝翻半番到3.13元，相對重估後NAV折讓，都係得65%，仍然吸引到爆。
力寶住9仙收貨
力寶華潤（156）最新NAV0.43元，現價（9.9仙）折讓高達77%。集團挨近五年半低位，市值得番9.1億銀，齋計手頭單一幢上海力寶廣場嘅市值，肯定超過集團本身市值。有咁吸引嘅NAV折讓同優質物業，冇有好怕。
力華嚟緊星期四會公佈08年度業績，集團一早已經發盈警，話業績可能見紅。一於吼實，股價若果受業績震盪，住9仙橫行底收貨。短打博升兩成到0.108元，力華肯定仲有過60%嘅折讓。
錢雋