金融海嘯來襲，唔等於市民會放棄普選。公民黨繼續力促政府取消區議會委任制，下周日即係19日會喺銅鑼灣行人專用區舉行街頭論壇，邀請唔同黨派代表出席。公民黨方面派出陳淑莊做代表，事關佢係青年公民主席；民主黨則由青年委員會主席莫兆麟迎戰，民協就派出青年部委員李健勤參加。
社民連仲諗緊派咩人；自由黨就好坦白，早以「冇人」為由sayno。民建聯同葉太領導嘅匯賢智庫就未有聲氣。公民黨最希望民建聯有代表出席，事關佢哋啱啱有成18位新副發言人出爐，既然個個都講到口才一流咁款，不妨借呢個機會showquali，睇吓係咪真係實至名歸囉。