若「吊吊Fing」是年少輕狂，那今日的譚耀文一定不輕易爆粗！囝囝皓哲今年兩歲多，自囝囝出世後他就希望將工作重心轉回港，以便有更多時間湊仔。從前吊兒郎當的他，經過這兩年多的訓練，自信說若有朋友來他家攻打四方城，可同時兼顧湊小朋友而不手忙腳亂，還可玩得盡興呢。
記者：林佩婷
攝影：周旭文
場地提供：798unit&co（25060611）
自創理論唔Work
為了培養親子關係，譚耀文一有時間就陪囝囝看卡通、迪士尼英語光碟等，但原來最初他不信這些教育，自己研發了一套理論。「湊仔當然會付出愛心，但有時我幾個星期甚或幾個月出埠做嘢，返嚟佢唔認得我，完全無反應之餘，抱佢仲會係咁喊，要等媽咪同佢講好耐先識叫爸爸，嗰刻真係覺得有啲慘！」所以一有時間，譚耀文就用自己的一套理論去等囝囝接近自己。「好似我鍾意聽古典、黑人音樂、Rap等等，趁我放工佢差唔多瞓覺之前就衝入房同佢玩吓，聽吓Rap培養感情，點知囝囝好有天份仲玩到癲晒流晒汗，跟住又要冲多次凉，之後仲唔肯瞓覺，又要媽咪同工人姐姐出嚟幫手佢瞓，搞到第二朝眼袋好大，老婆自然唔鍾意，話小朋友從細要有正規培育，所以我最後都放棄咗！」
心軟父母
記得以前看過譚耀文的報道，指日後若囝囝出世，自己必定是個嚴父，但訪問之下，他卻說未到時候嚴。「開頭我成日唔喺香港，太太就叫我做好人角色，點知太太自己又好心軟，一見佢詐嬌就即刻軟晒！好似早排佢掉相機落地，我都有扮惡話佢，但如果七嘴八舌咁鬧佢唔啱，好易令小朋友無自信。歸根究柢，最大問題係自己放嘢唔小心，佢唔識咁掉咗又唔可以怪晒佢，反而最擔心佢撞親。」
醫生遊戲見性格
兩位心軟父母，雖嚴格不起來，但亦從不過份縱容。譚耀文話最安慰是觀察到皓哲有善良的性格。「囝囝好鍾意我同佢玩睇醫生遊戲，佢有套扮醫生玩具，我哋又將啲公仔當病人，我做醫生。有時我會話Monster個肚腩太大，要切咗個肚仔，佢就會即刻話唔好，跟手搶走隻怪獸救佢。佢返學嗰陣先生都話佢性格善良，鍾意同同學分享唔自私。」
保持真我
無論單身前性格如何，做了父母後，性格或多或少都有改變。「囝囝出世後，我會以佢同家庭行先，要令自己變得更加穩重。好似我以前唔鍾意行街，但家好享受抱住個仔出街，唔會諗自己男人之家抱住個仔又或唔型唔瀟灑之類，因為抱住佢嗰刻，身貼身真係覺得好貼心。」但譚耀文還是有堅持，就是自由。「其實我都係近呢半年先真正Ready做爸爸，初時多咗個小朋友，突然多咗好多家庭聚會，自己本身唔係咁家庭嘅人，頭頭都覺得好攰，但唔參與時間過咗後就會覺可惜。為爭取個人空間，就會閃去圖書館或搵個地方靜吓。」但他說打死不離兩父子，會用寬宏角度去擴闊自己量度，盡量抽時間跟囝囝溝通，希望待他長大，依然可以跟他一起打打波聊聊天。
