天主教香港教區主教陳日君樞機嘅任期進入倒數階段，八方聽聞樞機退休後仍然會繼續做「米飯班主」，唔通佢學高官去私人機構搵真銀？
原來每年農曆年，樞機所屬嘅慈幼會修院嘅廚師都會放假，為咗唔想住喺嗰度嘅神父過年食穀種，樞機年年都會做「臨時大廚」，返去大顯身手，煮番幾味。樞機榮休在即，教區視聽中心準備下個禮拜日19號推出《神父廚房》升級版之《樞機廚房》光碟，由祖籍上海嘅陳日君樞機示範拿手小菜─上海紅燒肉。
平時着開恤衫西褲嘅樞機忽然紅白間圍裙上身，喺節目入面自爆細個根本未入過廚房，淨係記得排隊等媽媽炸豬油當零食，二十幾年前為咗做好替更大廚，先至搵妹妹教路。今次出鏡前，阿妹為免阿哥出洋相，仲專登幫佢整定幾張貓紙，認真兄妹情深。
陳日君話，煮呢味餸最緊要揀嚿靚五花腩，肥啲唔怕，入口就溶。除豬肉之外，仲可以加栗子、烚蛋同豆腐乾做配料。雞蛋烚熟去殼後放入雪櫃雪過夜，炆嘅時候就唔容易散開，臨煮前喺雞蛋上劃幾刀，就會更入味。
紅燒肉喺教會好出名
煮好之後，原鍋留過夜，第二日再用低火煮熟，啲肉就更好味。樞機話，呢味菜最好配陳釀花雕，事先成樽酒泡暖，再喺酒杯放粒話梅，趁熱倒酒，咁就perfect！
樞機嘅「上海紅燒肉」喺教會內相當聞名，兄弟們一傳十、十傳百，結果連喺第二度住嘅神父修士都過嚟食，「個個聽到『筲箕灣有紅燒肉喎！』，就會過嚟。」
今次節目請咗同樞機最老友鬼鬼嘅斐林豐神父試食，樞機話請佢嘅原因係「斐神父乜都話好食㗎啦，畀漿糊佢（食）都得㗎喇！」斐神父來自意大利，食咗「樞機紅燒肉」廿幾年，今次試食佢擺咗嚿肉落口都仲唔知究竟嗰嚿係豬肉、牛肉定羊肉，樞機唔知好嬲定好笑。佢又爆陳日君年年返去都煮好多餸，煮足三餐，上晝9點煮到中午12點，煮完一隻乾淨碟都冇，結果佢洗足三粒鐘先搞番掂個廚房。
樞機話，自己退休之後得閒啲，可以煮多啲嘢食。想知呢煲紅燒肉嘅頭號敵人係乜？點解陳日君對意大利修士特別惡？邊個夠膽死喺自修室隔籬擺肥田料？陳日君邊個手下最唔知死做逃學威龍？記得留意該節目，查詢可電25255588。
mailto:[email protected]
教你煮紅燒肉
紅燒肉材料（6至8人份）
五花豬腩肉：2斤
雞蛋：8個
栗子：1斤
葱：6棵
薑：4片
八角：2粒
桂皮：1條
米酒（汆水時用）：1杯
紹興花雕酒：1杯
生抽：3湯匙
老抽：1杯
水：2杯
冰糖：100克
油：3湯匙
資料來源：陳日君樞機