紐卡素領隊舒利亞呢勻要變「舒悟空」，先可以扭轉眼前嘅劣勢啦！首先，紐記上周六1:1逼和史篤城，仍排英超聯倒數第3，護級危危乎；母會修咸頓又面臨破產，佢老兄夠義氣幫手籌錢，忙到金睛火眼咁款！
講番「舒悟空」幫紐記護級呢單Job，分分鐘難過孫悟空陪唐三藏去西天取經。上周六對住史篤城前以為有機會爭3分啦！點知前鋒馬田斯嗰朝11點先發現受傷，老舒話：「哎！花成個禮拜備戰，之前冇受傷迹象，點知賽前先嚟傷，結果所有嘢都要再變！」
出「手榴彈」搶回一分
於是，舒利亞喺頭頂攞咗撮毛跟住一吹，變出艾美奧比拍奧雲攻堅，後防改以巴桑、賴恩泰萊、比耶出任3中堅，後備席就有新星安祖卡路爾坐鎮。勢估唔到，史篤城33分鐘就由菲爾先拔頭籌，紐卡素落後下更冇form，急到「舒悟空」紮紮跳。
好彩，「舒悟空」始終見慣大場面，竟然臨場偷師史篤城嘅「手榴彈」戰術，下令賴恩泰萊將界外球擲晒入對方禁區，70分鐘再換入安祖卡路爾；81分鐘終於靠「手榴彈」發動進攻，輾轉呢位後生仔頂入1:1完場。「舒悟空」攞到執教以來第1分後，守住倒數第3位，落後第17位新特蘭2分，場護級戰仍然相當漫長。
銀彈救修咸頓
舒利亞救紐記已經夠頭痛，最近仲幫埋母會修咸頓籌款㖭！話說該會母公司因財困被行政接管，因此球會球季完結前要籌到125萬鎊（約1,419萬港元），否則將被行政接管要罰扣分。目前，舒利亞連同前修咸頓名將拿鐵斯等人已向430人籌到75萬鎊，仲差50萬鎊啫。其實，錢解決到嘅問題根本唔係問題，舒利亞只要幫到紐記護級就有100萬鎊獎金，到時使鬼周圍籌錢咩？所以，「舒悟空」要幫紐記護級成功，到時就可以順便救埋修咸頓，真係一舉兩得啦！
