謝天華之前拍攝無綫新劇《老公萬歲》時，同一班比堅尼女郎一齊，噚日輪到苗僑偉車住幾位青春少艾喺街頭拍攝，兩位男士可謂艷福無邊，不過有甜頭當然有代價，噚日場戲交代苗僑偉一車靚女，但俾劇中惡老婆張可頤撞破，張可頤嬲到拎起垃圾桶拍車窗大罵：「行開，擋我者死。」嗌到聲嘶力竭，謝天華笑笑口話：「好兇狠，娶到呢啲老婆真係唔知點算。」
合照闢不和
Laughing哥謝天華喺街頭拍攝時，有幾位小fans等候，揸車經過嘅女司機都手指指大叫Laughing哥，謝天華即拋個眼神向女司機示意，苗僑偉載住嗰幾位女藝員都忍唔住搵佢合照，其間謝天華同苗僑偉坐埋一齊時又話：「我哋影相千祈唔好一人望一邊，唔係又話我哋不和，我哋不知幾friend。」
遭騎警查問
噚日謝天華又萬歲請大家飲嘢，雖然自醉駕後佢唔可以揸車，噚日拍揸車場面都要替身上陣，只係補拍一啲坐喺司機位鏡頭，咁都令佢過足癮，不過拍攝中途有騎警查問，了解後都好快離開。