泰國反政府示威高潮迭起，搞到去開會嘅溫總要坐直升機「逃亡」，真係無癮！《蘋果日報》都知道讀者關心呢單國際新聞，連日來以唔少篇幅報道，唔知係咪《蘋果》嘅報道太過詳盡同豐富，估唔到引來內地半官方嘅中通社垂青。
遣詞用字完全一樣
中通社噚日先後喺下午4點09分同4點19分發出兩篇有關泰國示威嘅報道，八方諗住睇吓有咩堅料，點知睇落熟口熟面，好似喺邊度見過，跟住拎番噚日份《蘋果》出嚟睇睇，發現成條新聞同《蘋果》嘅報道幾乎一模一樣。
好似4點09分發出嗰篇稿，除咗頭三段夾埋唔夠200字嘅內容之外，其餘900幾字除咗改一改個日子，基本上都抄足《蘋果》。好似一啲描述句，例如寫泰國總理阿披實想借東盟峯會，展示政局回復平靜，「但在二千名支持前總理他信的紅衫示威者大鬧會場後，碰個焦頭爛額」，遣詞用字完全一模一樣。
抄襲唔值得鼓勵，但八方阿Q啲諗，《蘋果》被半官方喉舌抄襲，證明《蘋果》新聞有公信力。唔知《蘋果》有關平反六四同爭取普選嘅報道，中央係咪都睇得到？