這邊廂，龍友盛讚Chrissie零瑕疵，驚嘆其噴血32D身材完美過樂基兒；另一邊廂，可愛女神Kama卻繼續守身如玉，賣鄰家女孩清純味道，令一眾電車男茶飯不思。龍友與電車男心目中的女神，各有上位路，Sexy對戰Kawaii。
記者：蒙為亮
攝影：陳陶鈞
鳴謝：屯門市廣場
Kama
羅凱珊，2007年入行，取代做了3年邦民代言人的梁寶琪（Crystal），成為新一代「邦民女」，迅速被捧為新一代o靚模，今年參與無綫電視節目《美女廚房2》，成為美女廚神之一。
Kama上位路：清純可愛
Chrissie
周秀娜，入行早期當Imagegirl，上圍32D，有「翻版樂基兒」之稱，曾參與《新紮師妹3》、《出水芙蓉》和《絕代雙嬌》等電影。
Chrissie上位路：性感型格
願意為藝術露三點
訪問前，我與大家有一樣的前設，第一，o靚模一定睇得唔Talk得，有身材無口才；第二，o靚模之間一定勾心鬥角，必定爭寵爭上位；第三，打開報章娛樂版，做得o靚模通常都鬧不和，人前互當對方透明，人後寫Blog展開罵戰。實情呢，剛剛相反，Kama與Chrissie沒有默契式的交戲，訪問全程有講有笑，彼此相識兩年，坦言未到好姊妹關係，但閒時都會談談港女話題，吹吹買衫經，涉獵到性感底線這話題，更各抒己見，關係比想像中好得多。
Kama=K Chrissie=C 記者=記
記：Chrissie，有無人話過你有身材無智慧，難聽一句即係胸大無腦？
C：無聽過，聽到咪當批評囉，我無時無刻都諗住增值自己，我想學多啲嘢，例如學好英文。
K：英文我都有學，之前學過日文㖭，不過實在太忙，所以放棄咗。有時真係忙到瞓都無得瞓，都幾辛苦，不過我好明白呢一行，有得忙好過無得忙，無得忙即係手停口停。
C：係呀，最辛苦一日走幾場Show，好攰，所以我喪飲咖啡提神。一放假，我會匿喺屋企喪瞓一日，瞓番夠本先起身，不過我好耐都未放過假咯，家忙拍戲拍廣告，仲要影寫真集趕書展出街，個腦只係無意識咁不斷工作，好似無一秒可以停低落嚟咁。
K：我都試過呢種感覺，有次幾蝦碌呀，可能真係太攰啦，行緊Catwalk，突然間郁都唔郁企喺天橋上面，有兩秒自己個腦完全空白，好彩我識執生即刻當無事胡混過去，諗番起都覺得搞笑。為提神同避免腦袋一片空白，開Show前我會食番幾粒朱古力。
記：食朱古力，唔怕肥咩？做Model要Keep好身材喎。
K：邊驚得咁多，適可而止囉，好彩自己唔係個易肥嘅女仔，所以都OK。
C：我都無乜健康餐單，又唔戒口，又食消夜零食，不過家開始要勤做運動嘞，因為本寫真集明賣陽光海灘三點式。
記：Kama，你睇過Chrissie嗰個三點式廣告，覺得點？
K：Chrissie拍得好好睇，又Slim，如果有機會我都想試試，不過三點式暫時已經係我性感底線。
C：嗰個廣告，我自己都覺得效果好靚。每個人對性感把尺都唔一樣，我自己接受到就OK。
K：咁你會接受到乜程度先？
C：老實家仲未Ready到露三點，如果好似《色，戒》入面嘅湯唯咁，為藝術而性感，甚至全裸，我諗我都會試，過多兩三年等自己再大啲，諗嘢再成熟啲先慢慢決定。
當女神受之有愧
Click入大小討論區，不難發現癡心網友Fans經常搞甚麼網上o靚模女神選舉，每次選舉，Kama與Chrissie必穩佔三甲，一個可愛清純，一個型格性感，對女神這封號，二人皆腼腆地耍手擰頭，她倆反而各自有心目中的女神。
C：我鍾意拍戲，拍電影學到好多嘢，可以接觸多啲特別嘅人同事，所以捱夜捱到幾殘都好，只要有得拍我都會繼續拍。
K：我同你一樣，啱啱都拍緊新戲，我哋呢亭電影初哥真係好多嘢學。我由細到大都鍾意睇外國電影，如果可以同心目中嘅女神安祖蓮娜祖莉合作就好啦，不過我知無機會，純粹諗吓啫。
C：我嘅女神就近一啲，我鍾意張栢芝，栢芝好有性格，拍電影感情流露好自然，佢每部電影都充滿感染力。
記：做女神，要具備乜條件？
K：每個人心目中嘅女神定義都唔同，我真心鍾意安祖蓮娜祖莉，佢外表靚心地好，助養好多小朋友，我諗做女神起碼要具備以上條件。封我做女神喎，我自問當之有愧。
C：女神一定要有性格，Style好緊要，唔可以隨波逐流，徐若瑄同大S敢作敢為，我希望有朝一日都可以做到佢哋咁。家啲人封我做女神，好明顯係因為我身材，希望呢點遲啲會改變。
K：聽到人哋叫我女神，我都有啲唔好意思，不過講真個心係開心嘅。呢個世界無人唔鍾意俾人錫，不過錫都要有個譜，自己試過俾男Fans騷擾，希望同類事件唔好再發生啦，如果唔係都唔知點算好。
記：Chrissie有無諗過公開同髮型師男友戀情，會令男Fans失去幻想，o靚模女神地位不保？
C：無諗過呢個問題，拍拖好正常啫，我同男友感情好好，目前工作為先，其他嘢我無諗過。同埋我咁睇啦，真正支持我嘅人，應該會支持我同佢，其他女Model都有男朋友啦，你話係唔係？
K：呢點我唔知喎，我仲係Single，感情呢啲嘢順其自然啦，急都急唔嚟。
怕男仔機不離手
Kama一句：「我仲係Single。」我想，又會令一眾電車男充滿無窮幻想。近期港男港女成城中熱話，二人是否如「三萬港女」般非有錢仔不嫁？還是如山田孝之的《電車男》橋段一樣，只要是真心相愛，毒男與女神也可長相廝守？
K：男人，外表金錢係其次，最緊要成熟穩重有上進心，呢兩樣係我揀男朋友先決條件，我好怕男仔小朋友，唔識大體。講緊嘅小朋友，唔係咬手指、發脾氣、搞爛Gag，係成日喺街大吵大鬧，鬧到個女仔喊仲要一個人走咗去，一啲男人風度都無。
C：冷靜啲，唔好咁激動，我都覺得成熟好重要，不過孝順父母都唔少得，唔識錫屋企人嘅男仔，對你好極有限。你可能會覺得我偏激，不過Sorry，我真係咁諗囉，有啲男仔，連同我爸爸媽媽食餐飯都唔肯，我一定唔揀。仲有呀，我好怕啲機不離手嘅男仔，出街食飯Shopping全程PSP，真係好過份，究竟鍾意PSP定係我呢？
K：不過我都見過啲天生一對嘅，男嘅PSP，女嘅NDS，絕襯，哈哈。
C：咁夾簡直要結婚啦，哈哈。
K：哈哈，仲有呀，男仔爛賭無藥可救，小賭可以怡情，病態到一得閒就過大海賭錢嘅男仔，我一定撇。我都會同朋友打衞生麻雀，邊打牌邊講吓女仔嘢，不過唔係上落幾千幾萬囉。
C：有無錢唔係太重要，無錢，我自己都可以搵，呢個年代女仔應該有自己事業。家收入多咗，我開始投資兼儲錢，不過買樓方面暫時未諗住，過多兩年先考慮。
記：坦白講，金融海嘯有無令你哋收入大跌？
K：暫時未有，今日行Show都有五位數字收入，密食當三番啦，公司不斷幫我安排工作，拍戲、拍廣告、出寫真集，不過呢行好難做，我明白花無百日紅呢個硬道理。
C：係呀，我都唔係搵好多錢㗎咋，着嘅都係Sponsor衫居多。有時同Kama見到面，都會講吓邊度啲衫靚，其實我哋同一般女仔無異，大家叫我哋女神，實在神化晒。我哋都係做Model，打好呢份工啫。
二揀一點揀？
後記
訪問地點是某商場Catwalkshow，未開Show已經有超過40位龍友駐守現場，找最佳位置為心愛女神影拍照。任何Catwalkshow，但凡有Kama與Chrissie出現，閃光燈必定閃個不停，某些麻甩Fans更舉牌高叫：「我愛Chrissie！」聽罷我雞皮疙瘩，不過起完雞皮，我也情不自禁地拿起手中i-Phone，嚓嚓嚓的拍了兩三張相，畢竟這個世上，那有不喜歡靚女的男人？
