金管局總裁任志剛聽日首度去立法會作供，一班雷曼苦主話明會到實，睇吓任總點樣由有錯講到冇錯。佢哋仲會包圍立法會以示不滿，又計劃向雷曼小組主席何鍾泰呈上「血書」，希望何主席唔好放生任總。
何鍾泰聲言唔驚血，到時遇到雷曼苦主，一定企定定收請願信。佢覺得請願人士好文明，立法會聽日唔使加強保安。何鍾泰噚日先喺四川視察完災後重建問題返香港，呢兩日會為任總聆訊做好準備，例如召開閉門會議，研究吓邊個角度盤問證人先最有效。佢話19間銀行提交嘅回覆成尺幾咁厚，要變成一、兩頁紙嘅討論文件好高難度，所以真係要多謝秘書處同法律顧問鼎力相助。