教育局政治助理楊哲安上任後唔算高調，比較少喺公眾場合發言，市民都好難從佢嘅談吐言論，睇到佢係咪有料。但原來佢未入政府時，一直係自由黨辯論組成員，不時同其他隊舉行友誼賽。做咗政助後冇得再喺辯論場合一展所長，口痕起上嚟真係好難頂。楊哲安前日就出席咗自由黨舉辦嘅大專辯論賽，仲以評判身份向辯論員傳授心得，教吓同學仔點樣先可以練好口才。當日嘅辯題分別係「港府應回購領匯」同「本港勾地政策弊多於利」，同教育政策冇乜關係，唔知係咪專登避嫌，唔使楊哲安為支持正方定反方頭痕？