大膽刁民，竟然批評皇帝！香港好多人認為已故「九龍皇帝」曾灶財墨寶係珍貴藝術品，對於港府唔識貨，冇好好保存皇帝遺作失望又憤怒，非物質文化遺產諮詢委員會委員丁新豹卻認為，皇帝喺街頭巷尾、燈柱電箱所寫低嘅字，只係塗鴉，而唔係文化。
丁新豹噚日喺港台節目中表示，唔少對書法有認識嘅人，都會認為九龍皇帝嘅字係塗鴉多於書法，佢又話曾灶財嘅大字，對某啲人而言可能有集體回憶，但唔屬於非物質文化遺產，言下之意，官方不必花心機保存皇帝作品，丁新豹指如果勞民傷財去保留，擔心會鼓勵市民犯法塗鴉。丁新豹退休前係歷史博物館總館長，佢做慣官，對街頭藝術未必睇得上眼。