復活節假期到，成班老友結伴到福岡打高爾夫球兼遊覽九州，睇櫻花恐怕就過咗時候咯。打波使乜去咁遠呀，財務Ｌ話：「搵個藉口啫，橫掂放長周末假期，咪幾家人一齊去囉。但即使一早約好，都唔可以一齊去，有啲星期五去，星期一返，有啲星期六去，星期二返，總之大家各有各忙，好朋友能到海外共聚兩日，已算唔錯。」
啲高球發燒友為咗打波，用盡方法，不惜於周末晨早五六點鐘就起床，出發往高爾夫球場，好幾年前賓架Ｗ索性在東莞買咗一間屋，就近球場，打波本是為了輕鬆，為了健康，但唔少老友打波二十年，個個要搵骨醫，按摩師或脊骨治療師照顧治理。似乎打波唔係一定可以促進身體健康噃，至於披星戴月趕去球場，又何來輕鬆？
投資Ｍ就笑左丁山唔識打波，不知高球之樂，佢話上月往新加坡打高球，都唔知幾好玩，更加增進與彼邦客戶之感情，有益生意㖭。但玩樂之餘，佢亦遇上一位保健專家，專家勸佢選球場，要注意有否過度使用農藥，化學農藥可維持球場青草綠油油，但過份青綠嘅話，就要懷疑球場或球會管理人是否濫用農藥，球員（如投資Ｍ）如長時期在此類球場行走，或有可能沾上致癌物質（用劉紹銘教授指出嘅歐化句子就係：不排除惹上基本致癌物質的可能性）。
投資Ｍ聽完，心有戚戚然，返嚟同幾位波友傾起，竟然事有湊巧，聽到一啲如有雷同，純屬巧合嘅故事，就係十位八位經常在羅湖以北某球場打波嘅十數年嘅相識、朋友之中，呢三年來有五位先後患上癌症，三位鼻煙癌，兩位肺癌。當然將癌症扯上高爾夫球場，殊不科學，純屬猜測，但投資Ｍ聽到，一兩位波友知道之後，已唔敢再去嗰個球場。
復活節聽到呢啲故事，令左丁山不安，追查之下，上述少數人之中，竟然識得三位，更加無癮，好彩香港醫治鼻煙癌有超世界水平，早啲醫治可以有望治癒，幾年前一位朋友有此病，在加拿大施手術，反而唔掂，令左丁山一班老友遺憾萬分。