口頭禪「第N屆都唔選特首」嘅行會召集人梁振英CY，留下N+1呢條代數畀香港人推測，呢個謎可能有眉目拆解。《南華早報》噚日指CY已私下同人講會參選下屆特首，仲可能已向中央領導人探口風；CY例牌否認，不過空穴來風必有因，CY、唐英年同曾俊華跑馬仔大騷萬眾期待，隨時媲美草蜢出年25周年演唱會。
CY向民主派示好
唔少政壇中人都認為CY去馬昭然若揭，大半年前佢不理行會集體負責制，搶先開腔支持最低工資立法，又不斷撰文就振興香港經濟發表意見，早前更帶領本地專業人士去台北交流，比德成局長更快「登陸」台灣。
上兩個星期民主黨15周年黨慶聚餐，CY罕有畀面出席，而且冇快閃留低食埋餐飯，目的係競投華叔墨寶捐錢畀民主黨。需知道華叔係支聯會主席，今年又係六四20周年，CY特登買佢墨寶，示好意味甚濃，當然買幅書法唔等於洗底，CY與民主黨關係如何發展，有待觀察。
人緣麻麻一向被視為CY選特首死穴，有老愛國指出，同面面俱圓嘅唐英年比較，CY無疑差一截，但與鬍鬚曾比較，CY卻不見得很輸蝕，只要佢加以改善，未必不能扭轉別人看法。一個親北京議員則同八方講，本地政界冇人排除過CY選特首可能性，近期煲呔政府弱勢，唐英年、鬍鬚曾民望危危乎，趁佢病攞佢命，CY快馬加鞭係正常策略，不過佢話暫時未聽聞北京祝福任何人訊息。
八方相信CY短期內唔會明確表態，繼續猶抱琵琶風花雪月，佢喺自己個blog度話近日到訪紐約同華盛頓時，趕上櫻樹開花尾聲，可惜華盛頓翻風，吹下遍地落櫻，樹上頓顯凋零，佢不禁吟咗杜甫首《曲江二首．其一》解愁：「一片飛花減卻春，風飄萬點正愁人。」
有人指杜甫寫呢首詩，係要抒發不被朝庭重用嘅抑鬱煩悶，如果CY真係已經向北京領導人探口風，憑詩寄意，有無微言大義？CY只係引用呢首詩首兩句，最後兩句自勉睇開啲，「細推物理須行樂，何用浮名絆此身」，佢冇寫埋出嚟。
mailto:[email protected]